點擊圖片放大 +9 上年11月1日, 迎住3號風尼格,量地同幾個老同學,鳯凰變青蛙.老同學回台時約量地話下次回港,要完鳯凰夢. 量地哦哦哦,你再回港時至講啦.三月中旬,老同學鴨舌量地話29/3回港,約量地原班青蛙响31/3變番做鳯凰喎.量地心諗,你動真格? 好,拉多個農夫老同學幫拖!量地望住吹風台嘅由9天預報睇到30/3,都話31/3只係間中有雨.好呀,不過連埋量地,5個老同學加埋應該都有333歲,老老實實,唔該帶埋支篤篤篤幫幫呀.31/3, 9:15東涌港鐵站變大嶼巴到伯公坳.响伯公坳打點,打卡,伸埋支竹,放水做齊.好,GoGoGo,篤篤篤!5個伯公,原來除量地外,只得一個行過凰凰.伯公上鳯凰,頭K零,幾個伯公話雖然陰天兼雨粉,不過行起嚟都熱呀,要除衫呀.吓,行多少少就會當風喎.唔係老跌鼠落天秤,果然,一到行上石階,風越來越大,霧雨又迷曚.行到避雨亭,農夫老同學就攞出麫包俾老同學加加油.整整行裝,迎住風雨又起步.老同學問量地試過咁大風上鳯凰未?試過呀,上年31/10嗰次一號風,不過無乜雨.上次大風, 所以原定鳯凰咪變青蛙囉.人算天算,今日青蛙變落湯風雞呀! 越近鳯頂,狂風夾雜雨霧都咪話唔凍. 5隻豬,加埋333,終於上到搞生哂(934)嘅香港第二高瘋!對幾個湯雞雜牌伯公隊,就有風雨上豬木峰嘅感覺呀!由於風大霧大,四望都係A4紙,所以5個伯公响搞生撈埋農夫嘅加油劑,就告別山雞.都話上山容易落山難,再加上幾乎可吹倒伯公的強風,量地都多敢笈咁多印仔.一路下到斬柴坳後;強風被山脊所擋,幾個伯公才可以戰戰兢兢,篤住高低不一的石台楷下山. 到心經簡林,已近行了三個半小時. 稍息,經石門甲行落東涌下嶺,用了5個小時完成整個行程.咁辛苦,當然要醫醫肚啦!相識50多年老同學,難得風雨同路,互窒互笑無芥蒂.貪心啲,希望可以玩多過百歲.
