點擊圖片放大 2023都過咗成個星期, 都未同大家講句快年快樂添. 成個星期無聲氣, 無他, 由於忽然無乜心機. 做乜無心機? 咪因為隻馬囉. 量地食馬菜, 通常係馬菜前8周做記錄, 估算食馬菜要食幾耐. 唔好以為量地因為想做時間呀. 十零年前, 食馬目標係3:30內; 個陣時, 可以牙擦擦講, 唔使點操, <4:00都無乜大問題. 一登陸, 要<4:00就好勉強嘞. 疫情幾年, 2021.10嘅揸兜馬, 已經接近5粒鐘至完成. 量地對照上次揸兜馬八周操練, 起初還信心滿滿, 諗住可以<5:00完成今年嘅馬菜. 過去兩周, 唔知塞咗邊條線, 未入八周前, 走幾K後, 條氣就開始無咁喘; 點知一入八周, 走極都咁喘, 而且, 雙筷仲越走越縮. 呢, 30/12量地由大埔走出馬鞍山公園13K, 竟然要1:45; 平均要8:04分/K! 如果回頭行番大埔, 咪過4粒鐘? 好彩量地早有預備, 袋住張2蚊雞, 搭小巴走人. 1/1/2023新年伊始, 量地唔敢走咁遠, 出門就慢慢跑, 到吐露港5K位左右就俾正哥捉到, 正哥話陪量地度下步, 走一二百米, 行幾十米. 當然, 度度下正哥都頂唔順量地龜速. 咁計數, 越走越慢, 六粒鐘都食唔哂隻馬呀, 你話沮唔沮喪? 所以囉, 都無乜心機同各位講新年快樂呀. 今日例課, 量地的起心肝, 由大埔起步, 不停的走到吐露港6K位回頭, 近離島碼頭, 又碰到正哥. 正哥又話到6K位回, 睇佢眼神, 分明係想捉量地啦. 量地計下數, 仲有5.5K, 用7/K計, 返到大王爺要38.5分; 正哥6分K, 6.5K要39分呀. 好, 一於做電龜, 幾大都Keep住7分內! 果然, 哈哈, 返到大王爺, 正哥捉唔到量地, 仲質問量地今早食咗乜?嘻, 唔知係咪因為今日通關, 連帶量地任篤二脈關都通通哋呢? 在此補多句: 祝大家身體健康!