疫情還未消, 原定11月20日舉辦的馬仔賽, 據報話特區政府遲遲未批, 田總於9月16日, 以未能有充足時間預備已取消了! 峰迴路轉, 旋踵, 謂得特區政府的積極配合, 9月20日田總宣布馬仔賽又可以在2023年2月舉行. 名額一共二萬五,其中全馬, 半馬各六千; 十公里就一萬三千. 昨天, 田總馬仔賽正式接受入飛報名. 唔覺唔覺, 下年是香港揸兜馬第廿五屆. 田總話男子全馬sub 3:00 和女子全馬sub3:30的奬金, 會升價10倍, 由原來的千金變萬金. 量地心諗, 早40年就好啦. 點都好, 量地都入下飛, 碰碰運氣. 咪唔會, 吹水當然唔敢覬覦萬金啦; 只希望可以搏到一席, 做下慢甘遊, 用<5:00嘅時間, 唔斷咁完成揸兜馬啫.玩咗馬仔幾十年, 量地自問都可以恃老賣老, 吹下香江馬仔一啲是非和舊事. 好多港人淨係識揸兜 (唔好意思, 因為唔想賣廣告) 馬拉松. 又難怪, 1997前, 港府只重視經濟, 對體育活動不大支持. 其實1997前, 香港有規模的馬拉松賽事有二個. 一個是田總主辦或協辦, 每年有不同贊助商的香港馬拉松(有時稱香港國際馬拉松); 另一個是由香港長跑會在西貢舉行的“中國沿岸馬拉松”現時揸兜馬拉松算是香港體壇一年一度的盛事. 但是, 又有幾多人知道, 當年封路, 一眾跑手跑過封路的路段, 就給不少行人和駕駛人士鬧阻塞街道呢?有些人同量地講, 以為港深馬拉松是揸兜1997年首創. 其實, 港深馬拉松在1992和1993亦有舉辦. 咁, 又知唔知點解會搞港深馬拉松? 原因就是量地講過, 當年港府只睇經濟, 所以封路放給少眾(當年跑馬拉松的, 大約只得一千數百人)跑步, 不符經濟原則. 港深馬拉松, 只封粉嶺上水一段比較不繁忙的路段, 而且跑手一過, 就那那林解封, 不妨香港經濟.早期香港的馬拉松賽事, 年年都要改賽道. 而1989, 1994, 1995和1996就因政府不批賽道, 香港馬拉松賽事就停辦了. 亦由於1994~1996連續三年沒有馬仔跑(西貢的中國沿岸馬拉松好辛苦, 吹水唔敢去量), 量地嗰肚腩就被吹漲, 開始為慢甘遊踏實補底嘞!
