點擊圖片放大 +8 連續講咗2日山; 今日又轉轉風, 講番水. 上年吹水同水皮友搞咗兩次渡海泳, 都係由吐露角泡返大埔滘舊水警碼頭. 喂, 悶唔悶啲呀, 三幅被? 聽埋先啦. 一位已在港定居多年的外省跑友响20210710跟吹水玩過第一次渡海泳後, 覺得好玩, 要求嚟多次喎. 無問題呀, 橫掂量地平時都係咁泡水啦. 邊日好呀? 揀日朝早水漲, 眾無疑義就20210821啦. 臨到渡海日, 吹水睇睇日曆, 咦, 有少少問題; 不過, 大家都唔多覺, 吹水就又唔出聲. 定居多年的外省跑友, 忽然响渡海泳前夕, 問: “明日我雪凍個西瓜, 攞過嚟, 上水時食好唔好?” 呢個問題, 一時難到吹水, 索性無言以對. 第二日渡海泳無風無浪, 平平安安大家都上哂水. 吹水鬆一口至答: “你知唔知香港人買西瓜擲落海乜嘢意思? 仲有, 你知唔知今日係農曆七月十四日呀?” 各水友聽罷都哈哈大笑. 笑聲中, 2021小伙子隊嘅吐講港渡海泳完滿結束. 到2022年, 班水友好似各看官咁, 問吹水, 幾年都係咁嘅吐露港渡海泳水程, 你悶唔悶咖? 轉場泡啦! 不如响科學園碼頭仔游過對面丫洲啦. 你班友仔, 作反嘞! 膽心毛嘞, 去得丫洲, 咁回程呢? 玩都要安全嘛, 想玩, 就一定要水試! 於是今年端陽, 水試由科學園碼頭沿岸邊(諗住唔掂就可以上岸)游返大埔滘水警舊碼頭, 大槪3K啦. 哈, 水試當日一陣晴一陣暴雨, 班水友又全部過關喎. 吹水好均真, 以水試為標準, 唔會要求登陸嘅要醫生証明咁多餘. 不過, 水試合格, 就要打鐵趁熱, 一於下周日, 即係20220612渡海渡. 路線: 科學園碼頭>丫洲>馬屎洲. 水程約3K. 再由馬屎洲行出三門仔收工. 當天一早大雷大雨, 幾個水友等咗個半鐘, 雷暴過後才下水. 當然最終順利完成啦. 創咗新路線記錄, 班水友叫好, 20220612失場嘅, 要求再辦. 仲話要加長辦, 去丫洲再游去烏溪沙碼頭. 唉, 你班友, 好難招呼啫, 得一想二. 好, 一於鬥大, 嚟個三島一灘! 水線: 科學園碼頭>丫洲>馬屎洲>洋洲>龍尾灘終點. 只限水試合格者, 限期20220625舉辦! 講到做到, 嗰日天公做美, 曬到皮甩, 每島停停, 影下相. 玩咗5個鐘呀! 吹水想再慢慢講, 驚各看官悶, 都係唔吹咁多. 總之, 咁至係真真正正嘅吐露講渡海泳! 好玩, 正! 仲有啲似偷渡感覺. 明年小伙子隊搞渡海泳, 看官會唔會有興趣同幾個傻嘅一齊玩呢?
