一個人去西西里嘩有黑手黨喎!你一個人去?意大利好危險...(大家咁同我講, 我由買機票驚到到達一刻) 去之前一星期先打番香港同家中兩寶講我去玩. 好好彩, 無穿無爛... 平安回家的感覺: I am still alive! 2015-06-26 ============================================================== 話自己好準時既 ryan air, 遲到15分鐘。拍手拍手(全機人拍手, 搭完RyanAir通常全機人都會拍手)所以我 miss 左班去市中心既巴士。巴士三十分鐘一班。 繼而 miss 埋班火車。張飛寫住無得改。 遲左十分鐘終於到palermo centrale。 死好彩,info centre 話可以搭4個鐘之內既火車,唔駛補錢。其實我完全聽唔明呀意大利姐姐啲"英意文"。 去左間餐廳食左個炸Risoto(Arancini di riso).好食,不過勁多油。一枝水好貴,1.9歐。 意大利既火車又係一樣,一上車就得,上車無人Check飛,中途先Check飛。問個火車叔叔,佢一下就話唔識講英文。俾張飛佢睇,佢話 okok。差啲早左一個站落車,遲左成一個鐘到達。 好彩房東係度等緊我。 感動中。今次醒!租成間屋。真係要睇清楚係租一個床位定一間屋。一個女仔,所以租貴啲,57歐兩日。 我一去到旅館,已經好似虛脫咁。唔理3721,落街買個包。個陣已經十點幾。買左個panini. ============================================================== DAY 2 - Agrigento 我永遠都會記得2015年6月23日! 我計畫左去 valli dei templi (神殿之谷) 同 scala dei turchi (白色沙灘). plan係搭車去既。去無直車去 沙灘,要坐車去 Realmonte 再行3.5Km 我房東聽到我話想去呢兩度,即刻提議我踩單車。去 Templi 佢話半個鐘左右就到。因為係"落斜",好似3km 左右。去 scala dei turchi 就遠啲,10km。 其實可以兩三隻字寫完。 點知早餐完左就開始一日艱辛旅程 踩單車到達 valli dei templi. 我已經覺得自己完成左一項創舉,想像係香港,你有幾可會係路邊踩單車,條路咁窄。不過 Scilian 都好好,好照顧啲單車,單車行先. 仲有,我係度諗,聽人講神殿之谷啲殿唔近。所以諗住踩單車睇,原來入面唔可以踩單車,又7左。 點擊圖片放大 +2 石頭裡面有貝殼化石? 跟住去scala dei turchi (白色沙灘) 本來想放棄繼續踩,問人可唔可以帶埋單車上巴士。個識英文既叔叔話唔得 T^T 問佢踩住單車去 scala dei turchi 危哈危險?佢話唔危險。 因為佢既一句話,我就踩住車去沙灘。 架 車又太高,太高我又唔識落車,開始堅係驚。啲路高高低低,個 gear 又唔聽使。最後終於到沙灘,但唔見有白色既物體。唔服氣去唔到,沙灘問左兩個哥哥仔,其中一個真係好好好靚仔。佢對眼真係好似有靈魂咁。佢話你有單車,但好難踩到去喎。要5km!!當時心諗,我咁遠黎到,5km 都照去,真係顛左喇! 無人阻上到我去沙灘!!! 再問左士多姐姐,一開始佢唔明,我 google translate 佢。佢話行多35分鐘就見到,好靚好靚!形容俾我聽個陣個表情真係好搞笑! 聽到咁快就到,再踩多15分鐘,scala dei turchi !!!我終於黎到喇! 點擊圖片放大 呢種石應該同土耳其棉花堡個隻一樣。 原來白色既唔係沙黎,係石頭。 回程,入錯 highway!!! No Photo!!! 嚇S人 我都唔G自己去左邊 屎忽又痛,上斜最後推車,想放棄,但最後完成返歸。返歸又行錯路,順便買左半隻燒雞。返到已晚上9點@@ 說好的3小時呢? 見到Latte以為係Latte, 意大利文意思:奶 -_- p.s. 仲有一件靈異事件, 返到屋企, 開電視, 無聲有畫面, 畫面影住一個人訓左係一個類似棺材既物體上面, 我睇左一分鐘左右, 試下轉台睇下轉唔轉到, 好彩, 無事無事!!!嚇S人again... 過左呢日, 我有重生既感覺 ============================================================ DAY 3 - Catania 為左去多啲地方,朝早五點起身搭0614班車去 Catania, 大概十點到,因為今日要出火山喇!好彩好彩,唔駛一定朝早上火山大。有下晝 sunset tour 3-9pm. 好多 tour 都 9am 開始。 窗外風景很美 一黎到車站,我唔太鍾意呢個鎮,黑麻麻,又污嘈又多車多人。我最唔鍾意咁太迫。沿住鐵路行就係 Hostel. p.s.Hostel 張床高高低低,訓得唔舒服。 搞掂晒啲野就出去。我發現好多英國人都黎西西里玩。睇噴泉,古跡。。 Etc...Window shopping, 黎既目的都係睇 Etna火山。 仲諗住魚市場真係有即叫即食海鮮!全部都要煮既!仲有食左個燒茄子同燒洋蔥。麻麻,煎釀三寶好食啲。 食左個開心果雪糕!好味! 仙人掌味雪條。似片糖味。 終於再次食意大利粉, 為左食多次意大利粉而去意大利!?? 放低野,出番黎Join tour 上山。搵唔到路,走去餐廳問人,當時 auntie 答我。佢唔識英文,叫左個靚仔出黎教我,(靚仔可唔可以唔好痴咁埋我度睇地圖啦,我會面紅。) ok! 終於 join 大隊,同 Alexander 領隊上火山。我覺得都值得去既,不過都係個句,見仁見智啦! 不過唔好 expect 會見到溶岩。火山出既第一種花係黃色花,仲有粉紅色花,好香。唔記得叫咩名。 本人英文程度有限。 中途都有少少危險。山唔過,好似2000米左右,有幾個火山口。 原來有好多種唔同既石頭,有Volcanic form 既石, lava 石,紅色,黃色。古人上火山收集唔同既石黎畫畫。volcanic tube。Volcano Cave 只有十度左右。 最後有野食,酒。不過紅酒好澀。 仲有想講多句,我覺得下晝 tour 仲好過朝早。 因為無咁熱,無咁多人。同埋參加 tour 有人講解下好啲。 ============================================================= DAY 4 - Cefalu Palermo 話咁快黎到第四日。六點,禁熄鬧鐘之後繼續訓。由於運動左幾日,勁攰,唔係講笑。六點半突然醒起,仆街,07:14火車。 二話不說,彈起身。如果 miss 一班車,即是 miss 兩班車。因為已買埋 palermo 去 cefalu 個程。 出發,再睇一次時間,真係人係朝早記憶力係零,原來係07:38火車。鬆左一口氣。 突然多左時間, 影番張相先。 飲番杯凍咖啡, 生活態度下先。好味!係 Fappichino加可可粉。意大利的咖啡店係一張Bar枱企係度飲。 意大利人係係勁熱情,其實有無咩原因呢?連呢度啲狗狗都勁熱情,大部分都會吠,想Pok 上黎, 遇過三隻經過都係咁。對比起德國啲狗,完成相反。德國狗好聽話,唔熱情,似德國人。哈哈。 上車上車。 我係度諗緊諗緊,點解服務員睇左咁耐我張飛呢?突然諗到樣野,點解我唔係 Catania 直去 Cefalu, 要去左 palerma 轉車,總結,我慳左兩歐,但晒左兩個鐘,完。MY GOD 去到左,無luggage storage。掉轉諗,如果早到左兩個鐘。就唔駛拎多兩個鐘野。仲要上山下海@@今日攰到 hihi., "又"。 見到個個都係一班人上山。而自己得一個人,真係有點兒那個。仲要揹住個咁大既背包。幾時先有個 bf 一齊行下山咁呢? 不過,自己旅行大部分時間都唔係話好唔習慣,係咪真係慣左一個人@@ 去左個洗腳池,海邊,無落水。 This is the symbol of Sicily Via Vittorio Emanuele - 洗腳池 食左餐勁,30歐,一杯酒,一碟 Linguine ai Ricci, 一碟劍魚扒grilled pesce spada,唔得,我要食海膽 pasta 呀!下次再黎個陣先吃啦! 一個女仔食左兩份Main Course... 無人認得我 . 無人認得我 . 無人認得我 第勒尼安海 上城堡,上到大部分先見到有人,揹住個40L背囊想放棄之時,有對英國couple話幫我揹上去,真係想多謝佢地。T^T 終於都到喇! 城堡- Rocca di Cefalù 仲有,唔知係咩節日,有啲女人着住婚紗騎馬。 其實時間唔夠用,執左舊石想寄俾朋友都唔夠時間,除非唔上山啦,返德國先寄。 搭火車返 hostel, 基本上可以即時買飛囉其實,因為部機好易用。當初驚到時趕時間,又要問人又盛,上網買定飛。 撘火車走了! 回到Palermo。 原來Palermo 啲門牌號係一邊雙數,一邊單數既。搵黎搵去都未搵到Hostel, 招牌又無。意大利有過百條街叫Via Roma. 頂... 呢間Hostel開左兩個月,佢張床可以既,同埋有早餐(不過要搭早機所以無食),俾埋沖涼野你,有儲物櫃,厠所唔合格,第一,沖涼去唔到水,第二厠所塊 板會用用下跌落黎。 (住過最好一間青年餐館係 葡萄牙 Porto。) 附近係旺區,即時沖番個涼就落街,簡直爽呀! 周街行下, 想買番個見得下人既袋,不過揀唔落手,靚啲個啲又貴。再睇下先。(港女Mode) Hostel 附近條街Mercato Vucciria一到夜晚好多人飲酒,有即食海鮮。 有幾個英國女仔(聽口音應該係, 除非唔係)同地陪買野食。我買左舊魷魚,鮮味,5歐,唔好意思殺佢價。好多人飲啤酒。 Antica Focacceria 搵好多人話好食既豬肺包,途中有個男人見我搵路問我駛唔駛幫手,佢個鼻孔有啲白色粉囉頂,我話同朋友失散左。驚驚。走為上着! 終於搵到豬肺包。嗱,老老豆豆,我覺得佢煮耐左,不過配左芝士都好味,再加少少檸檬汁。 遇 到個韓國阿叔,佢話自己黎傾生意賣酒。咁咪一齊食囉,仲見佢同其他意大利叔叔姨姨坐埋一齊。咁食下野傾下都無野既,正常。佢地來自意大利另一個島。姨姨仲 請我食 Bomer, 即是炸 Risoto。走喇,條韓國大叔見馬路有好多車,拉左我隻手叫我行入面。再見個陣又懶熱情咁攬埋黎,妖。好彩話同佢唔同路,一左一右。唉,點解會咁架。。。。。# 豔遇呢 #唉,唔L驚。 ============================================================== DAY 5 - Palermo 早起身,其實琴晚訓得麻麻地。又訓又醒。 上車,到機場。 食個牛角包,飲杯咖啡。咖啡正! 最後上機前忍唔住都係買左枝意大利地圖形 lemoncello酒版手信 幫趁RyanAir唔少 總體而言,我都係想多啲人一齊旅行好玩啲!食又可以 share. 不過最好同志同道合,顛喪friend 一齊去最開心。 不過, 人一世物一世, 點都要試一次一個人的旅行。 返到屋企見到植物死狀好傷心T^T