我同老公因為工作需要，唔係成日都可以一齊放假，所以每次我哋一齊放假都必定行吓街，捐窿捐罅搵吓嘢食。🤣🤣🤣今次推介呢間小店比大家，平時我會用介紹，但今次真係不得不用推介呢個字眼。👍👍👍因為本來我哋諗住食下小食，飲杯嘢，抖一抖對腳，點知坐低後發現佢唔止有小食，仲有炒嘢，見到咁抵，當然叫返碟試吓先，點知叫完一碟又一碟，夜晚返到屋企都唔洗再食飯🙈🙈🙈餃子店地址：大角咀大角咀道157號中美樓地下豉椒花甲 $50花甲大隻夠新鮮，雖然用豉椒炒，但完全冇遮蓋花甲嘅鮮甜味，粒粒都開晒口，而且大家係出面其他鋪頭價錢通常都見到近百/過百，甚至係時價，份量仲要好少，仲要好多時花甲殼多過肉，呢度就完全唔係，份量超十足，粒粒都有肉，完全冇偷工減料。😍😍😍點擊圖片放大 椒鹽雞軟骨 $50表面夠乾身，唔會油淋淋，內裡超 juicy，用嚟送酒簡直一流， 而份量超大碟，多到呢，食極都食唔完咁。😆😆😆 糖醋排骨 $50講真而家豬肉咁貴，雖然佢一定唔會用新鮮豬肉，話係都呃你啦！但冰鮮豬肉都唔平，都唔明，點解可以咁大碟，排骨又唔會鞋口，最重要食唔到雪味，糖醋味好惹味，唔會過甜同過酸，送飯一流。🤗🤗🤗 辣酒煮東風螺 $60呢個又係不得了，份量又係超多，唔係細細粒，啜到咀都歪果隻，大大粒，用竹籤一挑就食得，酒味又夠，但對於我嚟講只係辣味就唔多夠，後來大廚出黎，見我哋兩個人食咁多，就同我哋傾咗兩句，原來辣可以因應自己口味而叫大/中/小同BB辣，以後我就識叫啦！😂😂😂 煎椰菜餃子 & 煎芹菜餃子 $10/4只餃子外脆內軟，熱辣辣，超 juicy，一咬落去肉汁流晒出嚟，我老公比較鐘意芹菜餃子，而我就鐘意椰菜餃子。😋😋😋點擊圖片放大 呢間小店外表唔係太起眼，但冇諗過味道一流，材料靚，份量大份之餘，價錢仲咁實惠又平，呢一間真係要推介比大家👍👍👍整體評分：90分我會為大家帶黎煮食、食譜、飲食同資訊分享比大家，請多多支持🥰🥰🥰記得追蹤我嘅facebook 同 IG 專頁呀！FB:https://www.facebook.com/winnieandlifeIG:https://www.instagram.com/winnie_winnie21UBlog:https://blog.ulifestyle.com.hk/winnieleung21#餃子店 #小店 #好味 #抵食 #份量超大 #勝價比 #推介 #勝價比超高 #食唔停口 #支持香港小店 #大角咀 #食好西 #相機先食 #烹飪 #美食 #食譜 #煮食飲食 #winnie_winnie21 #shopping #cooking #Hkfoodblogger #foodieshk #hkfoodblog #hkfoodies #hkeats
