24/7/2013 今日參加當地團到Praslin island & La Digue island雙島遊 零晨4點幾起身梳洗，5點就要去lobby食個light breakfast, 酒店好細心，一般都係7點先有早餐，佢地知道會遊客會早起， 好似我地咁一早去參加local tour，安排d麵包同咖啡，茶 就算一個麵包，我都覺得好好味 5點半左右，local tour既車泥接我地 全程車我都唔敢訓覺，因為要認住去Victoria的路 以便聽日自駕遊識路(因為租車唔包GPS導航) 大約40分鐘車程，我地到達Victoria附近的碼頭 旅行社安排左一位中國人導遊比我地，仲要呢團得我地5人 好啦! 出發! 首先會坐1小時船先到Praslin，然後再坐15分鐘船到La Digue 睇過資料3個島既海水藍程度係 La Digue> Praslin> Mahe 今次我一定要親眼見識下~ 到達 Praslin啦~ 有好多車係度等緊d旅客 呢架就係我地坐既船 要落船再轉另一架船去La Digue 呢個就係boarding pass，好得意! 到啦! 嘩! 真係好藍，係tiffany blue啊! 相機係影唔到果種藍 點擊圖片放大 碼頭又係好多接人的agents 有牛牛拉車~ 個島細細，最岩踩單車 我地就係坐呢d車仔去唔同景點 首先去當地椰子加工場，有位當地人示範開椰子 導遊話18世紀時，塞舌爾係無人住， 當時法國人登陸後發現島上只有椰子樹， 於是佢地就引入非洲奴隸，從事椰子樹加工，包括渣油 點擊圖片放大 行過有個沙灘，已經好靚啦~ 睇完開椰子，我地去睇當地既巨龜，佢地好鍾意濕濕既泥，要我咁住真係會C! 等埋其他同車遊客時，有隻狗痴住老公，我地無啦啦多左個團友 下一站係全世界第四靚既沙灘 Anse Source d' argent (by Geographic channel) 果然名不虛傳，水清，但沙唔幼，d水好似礦泉水咁，真係想飲 導遊話預左1·5小時比我地係度玩，正啊! 搵個位放低野，同安頓兩位長老， 我就同老公周圍行下 ，d水真係好靚，相機真係影唔到果種靚 點擊圖片放大 +3 好多外國比堅尼美女 但水淺又多海草，實情不適宜游水 行極都未去到盡頭，呢個沙灘真係好長啊~ 行行下比我發現係海草草叢中，有個心形坑，好sweet啊! 不經不覺時間都差唔多，要返回集合啦! 之後返回碼頭搭船過Praslin食午餐，當地食物算不上美食 我覺得係集合左印度菜，東南亞菜同西餐，不過不失! 食飯時有機會同導遊溝通多點，原來佢係山東過泥發展 之前係山東都係做旅遊業，但無咩發展，咁岩睇到呢邊有機會 所以過左泥呢邊，而家都泥左一年幾.. 不過我覺得佢好似不太喜歡呢個地方，仲好唔投入工作~ 食過飯後，我地就出發去五月谷(Vallee de Mai) 五月谷係世界上最小的世界自然遺產，面積有19.5公頃的國家公園 公園裡面有7000棵海椰子，海椰子（Coco de Mer）只在Praslin及Curieuse上生長 而海椰子係塞舌爾既國寶，唔可以隨便採摘，而想買的話要除去種子及肉 入到五月谷，導遊為我地介紹海椰子雌雄既分別，又真係幾似男女性器官 係個園區行左一圈，除左樹都係樹，空氣係好清新... 我地仲講笑話吸多幾擔清新空氣~臨走仲狂吸tim~ 之後，我地就坐車去拉齊奧海灘(Anse Lazio)，佢係排第4靚既海灘(by Geographic channel) 確實真係好靚，沙比Anse Source d' argent 靚，但好大浪.... 我地有2小時逗留係度，所以大家都換上泳裝去游下水.... 都唔係游水..係人肉衝浪，睇下幾大浪..... 最後，我比個大浪撞到成個人跌左，好在pat pat落地，但痛左成個幾星期 回程啦~睇埋日落景...望上天雲係一朶朶..好似棉花咁.. 今晚導遊車埋我地去victoria，晚餐係一間名叫海盜餐廳享用 價錢相宜，味道還可，大家一致認為比尋晚果餐好~ 而食飯前，導遊帶左我地去的士站搵定的士，仲講埋價tim~ 導遊話塞舌爾人好講信用，應承左泥就一定泥~ 返到酒店，酒店送左今日既小點心，丹麥條+朱古力醬，好好味~
