22/7/2013-23/7/2013 期待左兩個月，終於等到出發去塞舌爾+杜拜的富貴團 今日早上如常返工，下晝放假返去梳洗同拎行李。 今次帶左DBS張black卡去pageone拎左本忽周上機睇， 仲拎埋申請CX AE果兩張贈劵，諗住入貴賓室拎汽水，不過最後都趕唔切無拎到。 終於上機啦！delay左半個鐘先起飛。 我都係第一次搭長途機，原來搭長途機係好辛苦， 隻腳好攰好腫，坐得太耐，真係想係架飛機入面跑 飛機方面，今次搭搭Emirate(阿聯酋航空) 一直聽聞係好靚好豪華，今次終於見識到啦！ 香港去杜拜係搭A330，機底夠高，無壓迫感，坐位尚算闊， 電視好大，仲好高科技，好似放左個ipad係度，電影娛樂又多。 服務方面，空服員態度幾好，笑容唔算多，感覺係nice既! 送餐就慢左d囉！ 我同老公都對呢間航空超滿意，好過國X好多。 但係...呢程機我見到有幾個客投訴，話叫極無人理或搭過咁耐係最差一次。 食物方面，我地總共兩程機食左3餐（晚餐，宵夜，早餐），味道唔錯，連食神老媽都話正! 而中途派完飲品，佢會放架餐車係一邊，你要飲野可以自己拎。 仲有一個亮點，就係夜晚訓覺時，機頂有閃亮既星星陪伴入睡。 總結，佢地係顧客感受為先，而國X主要係以安全行先，所以好唔同。 幾經辛苦終於挨完呢8個鐘飛機，落到杜拜機場就周圍逛下，因為仲要等3個鐘先再搭飛機去塞舌爾。 聽說杜拜機場超大，免稅店24小時營業，盲中中都唔知佢有幾個terminal， 淨係係上機果邊行，都磨到兩個鐘，幾犀利! 杜拜特有駱駝公仔~ 上機啦！ 搭多4個鐘，塞舌爾當地時間7:00到達。 點擊圖片放大 我地之前經酒店訂左來回機場包車，係一架hyundai H1，但有別於香港，佢係一架12人車，真係好勁! 如果香港都可以有得揸呢架咁就正啦！ 講返塞舌爾，真係一個處女之地，好純樸，無添加! 呢度唔算太落後，好似乾淨版鄉下，擁有純天然既環境。 車路好窄，d司機超好技術，呢度山路好多，急彎又多，但佢地轉彎係唔收油架，嚇死! 而道路亦係無咩添加，所以連圍欄都無，車路無膊邊，路邊已係山谷，你話係米好驚嚇丫! 由機場去酒店要行車半個鐘，終於都到達酒店， 嘩!真係好靚啊! 真境靚過鏡，d海水係漸變藍，果一刻真係好感動，因為挨左十幾個鐘終於到達天堂啦! Lobby擺放幾個塞舌爾國寶 攪晒所有check in手續後，酒店職員就用架Goft車仔載我地去房間。 我地5人要兩房間，一間係一張king size床，一間係兩張queen bed， 每間房都有獨立泳池，有個好大既浴室，有個裝到4個人既大浴缸。 房間正門 入房啦~ 前面露台有兩張太陽凳 living room同bedroom一齊的~ 酒店有提供一系列資訊比我地，有埋潮汐表 飲品BAR~每日有免費既Capsule coffe 床邊掛左幾幅畫，都唔錯~ 入去有間大浴室，超級正~ 有個裝到4個人既大浴缸~我日日都有浸啊~ 酒店仲提供浴鹽~等我可以浸浴時消除所有疲勞，更加relax~ 每日有 L'OCCITANE提供~好正啊! 有獨立洗手間，背後幅海椰子畫好襯個環境~ 浴室有度門通出去出面，有個淋浴地方，方便你行去游水 或者游完水上泥沖身~仲有個架晾衫tim~ 隨離就係泳池啦~個泳池都算大~水深有1.4米 露台有提供一個點蚊香既兜，我好鍾意個兜，好靚啊~ 一入房我同老公都好不知所措，因為太好，一時間唔知做邊樣先好。 我同老公係屋內屋外來回行左幾圈，我就襯仲未攪亂間房,拿拿淋影幾張相 老公係那邊相大聲呼叫~原來佢係個食物bar見到隻gecko(壁虎) 酒店係床邊有留張字條，算係通知我地一聲呢度有好多genko，要同佢地好好相處 我地都唔敢同老媽講見到呢隻野，因為佢好驚架~~~ 出去玩之前，落泳池游個水先~ 一落泳池...嘩!D水鬼咁凍既~ 原來呢邊而家係冬天，所以無論泳池定海灘都係水溫低過氣溫 算啦~都係去開缸水享受下算啦~ 休息一陣，我地食完午餐就落沙灘游水﹑浮潛﹑曬太陽 沙灘隔離有個酒吧，隔離有泳池同餐廳，仲有好多沙灘凳比人曬太陽 點擊圖片放大 +2 入到沙灘，會有職員派毛巾，仲幫我地安排位置(沙灘凳) 送上一大渣冰凍檸檬水~爽~! 急不及待要衝落水啦~ 嘩! D水又咸又凍~都係上返去玩沙.... 但我地專登帶左浮潛用具泥潛水，為左唔好白帶，我地又再次落水浮潛去 太大浪同浮潛鏡太雞而入水關係，我決定放棄了~ 老公繼續堅持，仲影到幾張魚魚相添~ 無無聊聊，又唔想曬太陽受傷，所以周圍探索下~ 原來呢度都有養到塞舌爾獨有既巨龜，佢地好熱情，好主動要我地摸佢.. 行左一圈，去埋泳池游水就返歸 夜晚係酒店既沙灘餐廳食Fusion菜，都知酒店餐廳一定貴架啦~ 但無諗過貴夾唔飽，食完返去要補個杯麵~
