今次我地上到立山黑部其實真係非常好彩! 首先由plan行程嗰時開始,當知道排好上山嘅日子係日本公眾假期嘅第一日時,我已經好擔心會人山人海等車都等到花兒也謝了,仲諗緊要唔要掉過晒啲次序嚟避開呢日上山。但諗嚟諗去都覺得嗰日上山個行程係最順唔使行太多冤枉路,所以都照定計劃5月3日上立山。之前睇其他人遊記話排隊等cable car係最耐仲話要等成個鐘云云,心諗算啦不如唔好用pass就豪啲額外比錢上網另外訂定cable car嘅票咁就唔使排隊。點知官網表示紅日嗰三日唔可以上網訂票一定要即日買,但就另有告示話嗰日會有安排巴士直接由立山上室堂。咁我都諗既然有巴士,如果等唔到cable car最多咪坐巴士囉耐啲啫。所以我都冇再諗特別路線行程都係到時先算啦咁。 喺富山站就會見到一個細counter換到呢張由立山去扇沢嘅車票,約埋cable car嘅時間,我地約咗10點鐘嘅車,工作人員會自動幫你預時間唔使自己睇,去到立山就啱啱好可以上cable car喇! 到我地搭9點富山出發嘅電車嗰時就多咗啲人,但都只係廿幾個咁上下,電車都坐唔滿。另外要寄行李的話都係可以喺呢度寄埋去黑部嗰邊。 就係搭右手邊架立山號出發去立山喇! 好嘞以下呢幅喺官網嘅圖就可以好清楚知道上立山沿路要搭嘅交通工具。我上篇提及嘅嗰張JR pass係包晒圖中所有嘅交通公具,唔使下下買飛亦都慳返唔少錢同時間,所以我強烈建議大家買呢張pass!我地沿路一直都係順暢,人都唔算好多,啲人講最難等嘅cable car係多人但去到都唔係話多人到上唔到車,接駁巴士嗰啲要排隊但都係只需一陣就上到車,所以都唔覺得好辛苦。 就係呢架cable car喇。我覺得同我地香港上太平山嗰架都差唔多不過佢斜啲囉。10點鐘都人流都唔係超多可以接受啦。 車廂入面其實唔大,但都上得晒啲人。 搭完cable car又要轉巴士上室堂,等巴士都係一陣啦嗰度有人龍但唔係迫爆。 睇下出面真係超大霧能見度係好低! 不過一路上山天氣就真係麻麻,好大霧,能見度好低,坐巴士嗰時都替司機擔心睇唔睇到路。上到立山雪之大谷大概係11點幾12點左右,我諗大家都係呢個時候到達所以明顯地多好多人,但未至於係水泄不通嘅。由於天氣真係唔太好,好大風大霧,所以喺雪牆影相都唔係好靚。啲風每次一吹連埋啲沙呀冰呀咁打埋塊面真係超痛又好凍!我地行咗大約一個鐘到就返去立山酒店嗰度食飯喇。 好大霧,連後面個雪山都睇唔到。 我地嗰日去雪牆都係15米,睇落都唔係好高。睇下幾大風吹到我成個癲婆咁 人流都真係唔算多要避開人群影相都唔會好難,係影啲牌要排下隊咁囉都係一陣啫。 因為立山上面只有呢個地方有餐廳食飯,咁啱又係午飯時間,條人龍都好長下,不過因為餐廳都好大下,排咗大半個鐘到就有位喇。(其實樓下都有間立食蕎麥麵店,但都係好多人下) 話富山縣出名白蝦,咁就叫個白蝦天婦羅飯嚟試下,不過我覺得普通而已。 食完飯就繼續向前行喇搭電巴士穿越立山去黑部嗰邊。穿越咗立山去到大觀峰嗰邊已經變成好天冇晒霧喇,加上一望無際嘅雪山山脈真係好靚!跟住又係一輪嘅交通工具咁去埋黑部水壩就去到我地立山黑部嘅尾聲嘞! [gallery type="square" columns="2" size="large" ids="3336317,3336318,3331115,3336319"] 跟住去到扇沢我地就再搭巴士去大町溫泉鄉住一晚溫泉旅館喇。點知第二朝喺旅館checkout見到佢貼咗張告示出嚟話立山黑部寄行李服務暫停先知原來第二日山上面天氣太差全日都唔開!!!所以我地前一日上得到真係好好彩呀!!!