近呢年養成咗一個習慣就係星期六日朝早起身自己整個簡單早餐。本來嘅原意係早餐有食、食得輕營啲健康啲對修身有幫助，但整整下我啲早餐已經好似越來越大份一啲都唔輕營。其實久唔久我都有喺instagram post我自己啲早餐相，做咗個 #早餐食得好系列# 如果大家都係同路人的話歡迎分享交流下！ 懶輕營系列 平時返工為求快捷方便５日有３或４日我都係開麥皮食，所以如果假日喺屋企都唔會揀食麥皮，真係冇其他選擇時我就唯有比多少少心思切啲生果落去一齊食囉（我平時真係熱水開好齋）。有時星期六日得閒我會打下green smoothies，其實好易打，我多數用香蕉（急凍咗）、蘋果、baby spinach，如果有其他生果就會加埋落去一齊打。材料都好隨意，冇波菜就蕃薯葉呀或者red chard呀睇下有咩菜用咩菜囉。睇youtube啲外國人可以就咁朝早飲一杯就當早餐，但我唔得呀我飲完都係會肚餓所以佢只會係我嘅早餐嘅其中一部分。再懶啲或者想食啲暖野呢，我就會整小米粥，以前出差返大陸食佢地係落糖食，我覺得幾好味，但又唔想食咁多甜野，所以我就落少少鹽再加肉鬆，都好好味架！ 蜜糖士多啤梨麥皮，上面一點點黑色嘅係chia seed。 Green smoothies通常我打一jar會可以分到幾次飲。 肉鬆小米粥。小米用燜燒壺焗過夜就ok！開火都慳返！ 全部都係多士系列 芝士牛油果粒多士 蜜糖牛油果多士 太陽蛋多士，如果有茄汁豆加埋喺面仲perfect！ 如果買到靚生果就加埋入早餐入面。其實同平時你食飯後果一樣之嘛不過切定放埋一齊食感覺好似開心啲！ 偷懶嗰多士就咁搽花生醬撈speculoo spread。隔離黃色嗰杯係黃金牛奶。黃金牛奶對女士身體好呀可以多飲！ 多士係我最經常會食嘅weekend早餐。又快手又容易整，鹹食又得甜食又得。好心機嗰時就會整牛油果多士，用芝士搽底或者淋少少蜜糖喺面都好好食；想食鹹就煎隻太陽蛋放面，多士點蛋黃汁嚟食好好食架！懶嗰時就咁搽花生醬/ 杏仁醬/ speculoo spread/ 果醬就ok！（題外話，樽杏仁醬我係喺加拿大costco買，冇糖同話冇加任何添加劑。我都係第一次食，除咗聞落好香之外其實食落冇乜味。） 有啲豐富系列 bagel我都好中意食架！有時喺超市買急凍嗰隻bagel再整返熱佢再夾啲蛋呀吞拿魚呀咁。 嗰舊卷其實係手抓餅再夾啲甜椒同火腿蛋。我都係睇youtube見人咁食我都試下咋。手抓餅我當然都係買急凍啦邊有咁叻自己整。 鹹豆漿配台式蛋餅 呢個其實都係一個蛋餅嚟，我想整人地西式嗰啲什錦蛋餅，但我個煎pan太大整唔到厚身又煎燶咗，賣相差好差。 無糖豆漿、肉鬆小米粥、炒蛋跟住再加個泡菜夾手抓餅。 如果好心機，我真係會諗整啲咩早餐食睇落開心啲食落又開心啲。多數我啲idea都係睇下youtube呀tasty呀instagram呀睇返嚟，當然呢都係啲易整嘅野啦我都唔想太麻煩。我發現原來台式蛋餅其實好鬼易整，只要煎好塊好似薄撐咁嘅餅皮，再煎隻蛋喺上面咁就完成！中間如果想多啲花款就可以夾啲饀再卷埋佢，我上次試過夾芝士同三文魚係超級好食！ [gallery type="rectangular" columns="2" size="large" ids="3215926,3215925"] Hea食系列 有時真係唔係咁好心機整早餐又想食多啲其實都只係就咁炒個蛋煎條腸食下。現成野多數都快捷方便！ [gallery type="square" columns="2" size="large" ids="3215935,3215939"] 好啦我都想我啲相影得再靚啲咁睇落我好似好勁咁，除咗諗食咩早餐之外我會開始諗埋影相構圖點影得靚啲另大家都覺得我入得廚房出睇廳堂先XDDDDDDDD
