喺未計劃去比利時之前我對呢個國家只限於朱古力同窩夫仲有屙尿仔仔。孤陋寡聞既我都係男人講我知先知道原來呢度都好出名啤酒!黎到布魯塞爾真係原來酒吧仲多過cafe! 啤酒既種類仲要多到數唔晒!自問酒量還可以既我,唔知係因為太開心定啲啤酒太好飲唔覺佢度數高,一日幾杯落肚竟然feel到有啲上腦! 呢間酒吧我地一連兩日食飽就過黎隊啤,酒吧細細但人流超多。 呢個就係啤酒list!睇下佢種類多到咁真係唔識揀。不過如果女仔或者唔太好啤酒既朋友可以試下佢右中list既水果味啤酒,好易入口同酒精度低好好飲。除左種類多,睇下啲價錢幾平!真係平過飲水同飲咖啡呀陰公! 男人幫我叫呢set有三種唔同牌子唔同種類既啤酒。分別係(左至右)Waterloo, Tripel Karmeliet同Kwak。Waterloo係黑啤,出奇地三隻入面我比較中意佢,Tripel Karmeliet酒精度就高啲8點幾,Kwak我唔記得係乜好似都出名但我覺得冇乜特別。其實每間酒吧都有呢啲set比遊客一次過試幾款啤酒,有啲仲係水果啤酒set大家可以喺門口睇下啱唔啱先入去飲酒。 呢杯係男人杯Kwak,超大杯都係5€!!! 下晝去完上面間吧飲,夜晚食飽又飲過!今次去呢間Delirium Cafe。Delirium係比利時一個啤酒牌子,logo係一隻象,好似話係解飲佢既啤酒就會high到見到有隻象飛喎。 男人飲大我飲細,但我覺得佢杯細其實都大杯囉。 第二日訓醒食完第一餐又搵酒吧飲過!今次我就試左呢隻桃味啤酒,超好飲呀甜甜地好似飲緊cider咁。 呢度啲吧同cafe真係冇乜分別。呢朝我地去呢間吧唔喺遊客區,下晝點幾冇乜人我地隔離枱坐住個太太帶住個兩三歲既囡,阿媽飲啤阿囡飲熱朱古力。另外一邊就係個阿伯飲啤快到好似飲水咁,老細就勁悠閒咁同自己friend吹水,阿伯想再order老細仲講笑話「你唔見我好忙咩而家」。呢啲畫面好得意真係冇咩可能喺香港見到哈哈。 跟住我都唔記得做左啲咩見又冇乜野做我地又返去之前上面間吧又飲過!今次飲呢杯Delirium Red, 嘩又係好好飲呀啲啤酒係紅色同好易飲! 然後續杯就飲呢杯Hoegaarden Rose, 純粹見到佢係rose所以想試,幾好飲既啱女仔飲囉。男人嗰杯係Honk酒杯都係一隻角,又係大杯到飛起。 喺遊客區Grand Place除左好多朱古力店仲有好多賣啤酒既舖,入面咩牌子既啤酒都有買黎估手信非常good!