好多人去旅行都會寄明信片比自己同朋友。 我覺得寄明信片寫咩內容唔重要，最開心係朋友話比你聽佢收到你寄比佢既明信片嗰一刻，因為除左覺得帶到一啲旅行中既回憶比好友之外，仲有一個最大既感覺係張卡終於平安到達！ 明信片永遠都係當我個人已經返到屋企佢先施施然到，尤其係當我係臨上機嗰朝先去寄。人已經返左黎兩星期，最後一個好友先收到佢嗰張。不過好高興最遠嗰張由北半球寄去南半球可以係好友生日前到達，非常感動 :) 講下巴黎既郵局，其實冇乜特別。冇特別到一個程度係我去到都唔知佢係一個郵局。（好啦後來我睇下人地寫既遊記先發現原來係我去嗰間冇乜特別加上自己冇乜留意啫）聽講通常去排隊比左錢交郵費職員都係比一張好普通只係寫左郵費既貼紙比你，不過男人覺得我寄比朋友應該用啲靚郵票，所以就幫我問職員要左張真郵票，上面仲有我最中意既聖母院。
