前日巴黎氣溫聽講有成36'c, 仲要冇冷氣, 我諗如果我喺嗰度應該溶左。 今次去巴黎我好想做既其中一樣野就係坐喺鐵塔下面既草地扮下野晒下太陽望下人發下呆咁。黎到發現原來鐵塔下面個塊草地其實唔係好大兼超級多人, 所以最後我冇做到呢個咁扮野既行為XDD 不過呢黎到凡爾塞宮既後花園我終於可以搵到呢個最perfect既地方做呢件事喇! 凡爾塞宮花園既大運河原來係開放比公眾。我去嗰日係星期日所以開多一家大細去嗰度野餐散步。其實嗰日人都非常多, 不過因為大運河實在太長太大所以依然係有大把空間比你攤。本來我好天真地以為我有一整日既時間我應該可以慢慢沿住大運河行完再行其他地方, 但當我行到一半實在覺得自己太睇少呢條河了根本就見唔到盡頭!於是就㨂左樹蔭下一個地方坐低食個包, 睇下人撐艇仔, 睇下隔離個family打波, 寫下野發下呆, 一坐就坐左一粒鐘。 我就係行完遠處既凡爾塞宮之後行到黎大運河接近中間既呢個位坐喺度發呆同幻想一下自己係當時既公主皇后遊花園喇哈哈哈。 呢度好似係花園同大運河中間既水池, 你睇下根本係望唔到大運河既尾。 行過頭先個池再回頭望返去凡爾塞宮, 其實都已經好遠。 返番轉頭凡爾塞宮既一角。 我比較中意凡爾塞宮外瑪麗皇后小行宮既花園。 我諗我明白點解當時既皇后要整到個花園咁大一來要顯勢二來咁當時真係冇乜野做係下花園又一日咁會容易啲過日子既。個花園又咁靚喎真係行下都好開心架喎。真心推介朋友們去凡爾塞宮一日遊因為首先門票只係25€就可以行晒咁多地方真係好抵, 第二就係睇下成個皇宮幾大嗰種氣勢同道金色大閘仲有裡面浮誇既裝潢認識下咩叫真正既豪華, 但最緊要真係要睇呢個花園仲有其他既小行宮因為啲花園真係好精緻。