老老實實, 我其實唔係好知正宗法國菜係點, 不過我知巴黎除左有法國菜食仲有好多唔同國家既好野食。今次就講下我自己食過既野食! 相多啲所以我要分開兩篇寫(講到食真係多啲野講哈哈), 不過呢篇講左啲法蘭西野先! 首先我一定要講呢一餐! 因為呢餐係我覺得最最好味亦都係我最最掛住既, 就係鴨胸(magret)同truffade。我本來係唔係太中意食鴨胸, 但唔知點解覺得黎到法國係一定要食下鴨。呢個鴨胸我冇誇張, 佢真係我咁大個女食過最好食既鴨胸! 唔UN, 唔羶, 好JUICY, 好淋, 好似据緊扒咁! 係真係好好好好味! 另外個truffade我之前都未食過, 佢係用芝士, 蒜頭, 同薯仔煮到好似薯蓉咁但又未至於係好蓉...味道係十個好味!!! 不過食完之後就會成口都係蒜味哈哈。 ↑↓ Magret & truffade. 塊鴨胸佢寫到明有380g所以真係好大塊。佢會問你塊鴨要幾熟(好似牛扒咁) 我要左pink, 你睇下佢嫩嫩既粉紅同幾多汁我而家見到相到口水流! 上面張相既左上角你可以見到個truffade啲芝士有幾多!!! 飯後就黎一杯espresso, 但重點並不是杯咖啡而係跟咖啡既嗰塊speculoos! 佢好似係一塊cinnamon cookie咁, 好喜歡cinnamon既我大愛呢塊餅! 所以我買左一包返香港自用送咖啡! (speculoos係普通野, 各大小超市都有得買) 間餐廳有兩間分店, 我就係去14區個間, 地址如下: 跟住另一日我就去左食法國薄撐, 原來咸既叫做galette bretonne, 甜既先叫crepe, 真係唔識野。其實我喺香港食過一次galette bretonne, 喺灣仔皇后大道東嗰間, 但嗰時冇乜特別感覺, 只係覺得間野好大陣油煙味...去巴黎前都冇諗話要再試galette, 只係嗰日諗唔到食咩好, 突然又諗起呢樣野, 心諗好啦再比個機會佢睇下係咪喺法國會好食啲...結果係可能心情好, 所以好似係好食啲喎哈哈! ↓一樣地叫左apple cider, 一樣地都係用碗飲, 其實真係幾好飲! ↓ 我叫左個cheese + mushroom, 冇ham咁咸, 個皮煙煙韌韌, 都幾好食。咪睇佢薄薄地咁, 其實好鬼大塊, 芝士又多, 食完之後好滯。想叫crepe食都食唔落。唯有下次再黎試。 間餐廰喺15區, 就係我住既studio附近。聽講開左好多年, 算係老字號卦? 前文有提到我住既附近有好多bakery, 於是乎我隔日就會幫襯佢地一次。由於本人好中意食croissant, 所以如果要去買早餐食, 一定係去買croissant! 基本上我覺得是但一間既croissant都好食過香港好多! 好脆好香仲要好大件! 真係朝朝食都唔厭! 仲有, 其實我覺得法國食野樣樣都大大件/碟, 如果食埋前菜我係唔會食得晒所有野! 甜品冇次食得落! 所以我真係唔明點解法國既女人食完main course仲可以食甜品但都唔肥...點解??? 根據小丸子既哲學, 黎到法國係一定要食法國蝸牛。我都唔執輸, 因為喺香港食嗰的都唔係蝸牛, 而係田螺。所以, 咩都要試既我死都要試。結果係...我覺得唔難食, 但都唔係好食囉, 叫做一場黎到點都要試下咁啦。(其實我好鬼娘係都要試啲老土野哈哈) 好下次繼續講我既飲飲食食, 下次會講我從來未食過既黎巴嫩菜。
