香港提早去到2047,突然老左27年,身心都感覺疲憊!唔知有生之年有無辦法睇到香港變好,定只會越來越差。不過都要適當慰藉一下受傷疲憊既心靈,唯有食下美食、擼下貓啦!最近去左一間一直想去既黃店【Urban Café】慰藉下。 可能好多貓控手足都認識呢間【Urban Café】,雖然係主打貓貓café之外,其實佢地D野食都好高質好好味,分量好足,一D都唔hea。我地就叫左晚餐2人餐$298。每個套餐都包括沙律、餐湯、自選主食兩款,兩杯飲品。 沙律:和風麻醬沙律,菜新鮮而且好特別有菠蘿!餐湯:忌廉南瓜湯,用新鮮南瓜茸加忌廉整,非常creamy,而且南瓜味濃!非常真材實料! 滋味2人小食拼盤(+$28):拼盤裏面包括炸薯、炸魚手指同炸雞粒。炸薯比較特別,係厚實多肉薯塊,好熱辣辣而且好香薯味!炸魚手指就一般、有少少腥味,炸雞粒細細粒好得意、方便食用。 挪威煙三文魚水煮蛋黃金卡邦尼扁意粉:非常creamy但唔heavy,水煮蛋仲係流心,而且好多餡(煙肉、蘑菇)。煙三文魚雖然得一片,但都幾好食!鍾意食白汁creamy意粉的話,非常推! 巴馬火腿拉絲水牛芝士手工薄餅:雖然巴馬火腿量唔算太多,但芝士真係好多,同埋真係會拉絲!餅皮好薄好脆,熱辣辣。不過我自己本身唔係好食酸,覺得番茄醬有少少酸! 特濃鮮奶朱古力:都算濃,但又唔會太甜太heavy!同鹹食好match。 茉莉綠茶拿鐵:奶偏多既綠茶拿鐵,唔會太甜!而且地方好大、有超多貓,單單我見到就有15隻貓以上,仲未包括我未見到果D!如果想同貓貓玩又想食好野,黎呢到就唔會錯! 地址:觀塘開源道62號駱駝漆大廈第1座6樓