大家知唔知道? 最最最…最遲幾多要去到機場先趕得切上飛機呢? 今朝我可以講係話試咗依個最最最最limit喇。 話說小女搭今朝早8:15嘅港龍飛機由香港去檳城,尋晚call好的士約好6點半屋企留下等。一心諗住坐定粒六,點知今朝一開眼,望見電話上嘅時間係『7:11』 第一個反應當然係鬧爆個司機完全冇出現,然後怪部電話點解鬧鐘冇響,一路鬧一路換衫。好好彩之前嗰晚執好晒行李,online check-in 埋,跟住一支箭跑落街揾的士,望望電話,係『7:15』。咁好彩等兩三分鐘比我揾到部的士,而佢又肯去機場,7點18分全速飛奔去機場!!!!(真係遇過無數次拒載嘅司機遠遠見到你拖住個喼,即刻踩行油門楂走㗎) 由於小女家住港島區,7點30分先踏入西隧,平時覺得好近嘅路程,今日覺得超級遙遠。跟住司機又心情好似好靚不停聊我講野,我又要比吓面答吓佢,心諗住「揸快啲啦司機大佬!」。 好唔容易到咗南灣大橋,我心已經開始標緊冷汗,司機又講話:「呀唔知點解每次經過依個位就好臭,就淨係依個位㗎啵,都唔明西九啲樓對住個臭海又賣到咁貴點解嘅,送比我都唔住呀。」我無奈咁hea答「哈⋯⋯⋯⋯係呀呵⋯⋯」 依個時望望電話: 7:40 check check港龍個App,飛機準時8:15起飛,平時又唔見咁準時!即係倒數35分鐘,而我係仲未到青馬大橋。 ................ 終於........ 終於見到曙光:『T1出境及入境大樓』時間係7點57分。 點知long weekend 勁多車排隊等落客,幾經辛苦,8點正終於落車,攞住喼狂奔去港龍counter,用最甜美嘅聲線同地勤哥哥求助,skip咗排隊直接過海關。8點10分過埋e道,跟著要跑去31閘口。雖然平時有練過吓跑,但係熟悉香港機場嘅你都知道,由海關果個位去31號係真係好.....遠,堅跑到肺甩。 去到31閘口,搭正8點15分,好彩仲有1家人拖住bb遲我大概5秒,求咗我一命!THANKS GOD! 哈,總結今日嘅火拼時速之旅,我由打開眼到坐上飛機係用咗1個鐘頭零4分鐘。以上經歷,Lala奉勸大家切勿切勿模仿,真係心血少啲啲都嚇到心臟病發呀!加上因為依班機一日得一班,所以先趕頭趕命飛奔去catch依班機。亦都係小妺飛行history入面破嗮記錄,榮登「最遲到機場而又上到飛機」之榜首。 講咗咁耐,小妺子我其實係仲未刷牙洗面化裝梳頭,又臭又未瞓醒咁樣上機先趕得切㗎咋⋯⋯⋯(哎呀,冇晒形象喇今次) 附上張<檳城背影>相挽回返小小美女形象先,嘻嘻。 報道完畢