談婚論嫁 - 屋企定係酒店出門好 呢個實在係唔少新人需要心思熟慮嘅熱門課題，當然要考慮嘅因素都離不開空間、位置、金錢。 香港人好多都係住緊幾百呎嘅單位，平時一家四口出出入入都可能會有身體踫撞，而家加上數十個兄弟姊妹仲有等住飲茶嘅姨媽姑姐，一下子要上演一場歡樂滿東華真係並非易事，所以選擇酒店出門都不失為一個好方辦法。但由豆丁咁細粒到今天準備成為人妻嘅你都喺呢間屋到長大，想喺自已嘅閨房出嫁亦都理所當然。但黎明話齋「左手又係肉，手背又係肉」，魚如熊掌喺當前究竟點揀好呢？（其實有邊個會揀熊掌XD） 正在苦惱緊嘅你，由我話你知兩者嘅好與壞俾你多角度考慮！ 屋企出門： A. 感覺主意 - 自已屋企出門氣氛溫馨啲，正所謂龍床不及狗竇，仲要懷住待嫁嘅興奮心情實在難以入睡，都係瞓喺自已張床舒服啲。 B. 地理環境 - 如果女家同男家本身都係同一個區甚至同一條村，咁緊係選擇屋企出門，時間都慳唔少啦。 C. 錢金因素 - 租晚酒店幾千銀，結婚已經咁多開支，呢啲非必要嘅支出就免喇。 D. 空間大少 - 如果你本身住緊千幾二千呎甚至再大嘅屋，空間當然唔你要考慮嘅因素。但如果你同我一樣都係住緊幾百呎嘅單位，咁一次過要放幾十人入嚟就真係要諗諗計。但凡事都有兩面，好多屋村嗰條走廊同Lift口大堂真係闊落過租間總統套房，喺到玩新郎遊戲絕對冇得輸。 酒店出門： A. 唯美主意 - 有啲酒店有大大隻窗可以透入自然既嘅陽光入室內，加上空間闊落啲，又冇咁多雜物，要影靚相自然容易得多啦。（但當然首要條件係間酒店要靚先） B. 地理環境 - 正如之前所講男家女家本身近就固然好，但如果車程有返咁上下時間，租一個近男家嘅酒店都係慳時間嘅方法。如果能夠晚宴同出門都同一間酒店咁就仲方便，啲物資早一日就上晒房，接完新娘就唔駛走難咁搬嚟搬去。 C. 無手尾跟 - 做過兄弟姊妹都知自已有時搞到人哋屋企有幾鬧搞，啲忌廉同洗腳水玩到一地都係，又要清潔打掃又煩又浪費時間。酒店出門喺唔好太過份太倒亂嘅情況下真係玩完就閃，舒舒服服。 D. 空間大少 - 如果你屋企空間不足，又冇一條大大嘅走廊，咁考慮租一間面積大啲嘅酒店房就解決咗問題。 當然最後點樣選擇係你自已嘅決定，但如果你發覺原來仲有好多考慮嘅因素係我未提及到嘅，都歡迎嚟同我一齊討論下吖。
