發覺好多時，攝影師認為理所當然嘅事，其實喺好多新人同賓客眼中覺得係無法理解。 都聽過唔止一次有朋友去完婚宴之後同我講：「唔明點解要台上嘅人去遷就攝影師行左行右，佢自已唔識郁架？！」 呢一刻我真係好想大叫一句「冤忹呀……」但同時間亦明白到，原來被攝者其實唔係好了解我哋做緊啲乜！！ 身處喺唔同位置都會有唔同嘅著眼點，站立喺台上嘅你，眼前就只有一個看似身輕如燕活動自如嘅攝影師。但喺攝影師眼中，眼前就係一幅賓客左右唔平衡，人距唔平均，位置唔正中嘅畫面，如此慘不忍賭嘅構圖實在難以叫人按下快門。一張"合照"，可能喺別人眼中只係一班人排排企，然後舉起iphone襟一襟按鈕就隨手可得到嘅照片，彷彿就連小學生都可以輕易處理嘅事情。 但攝影師除咗係一個相機操控員之外要顧及嘢實在多得很。要控制主角對正喺背後嘅名牌之下，要安排賓客平均分佈兩邊，要制止懷住興奮心情似係忘記咗要影相只記得同旁人滔滔不絕雞啄唔斷嘅你，要留要賓客有冇左顧右盼而冇專心望相機，要望清客人有冇衣衫不整，要引導小朋友暫時將專注離開手上嘅玩具。最重要係喺而上所講對構圖嘅執著同有限嘅時間再加上無限嘅來賓之間作出一個平衡點，一張"好嘅合照"絕對並非只按下快門般簡單。 所以勞煩賓客走多兩個身位無非都係希望張相可以整整齊齊，免得焦點被其他嘅賓客搶走。 但旁人對攝影師嘅誤會真係太深，又有另一位朋友講：「一個組合要花時間影成3,4張，如果個攝影師係掂嘅影2張已經好足夠啦。」 或者你有試過影完大合照後翻查時先發覺相中有竟然有人類嘅眼睛可以同你部相機嘅快門同步，機眨佢又跟住眨，當你抬頭想叫大家再影過張嘅時候已經發現人去留空後悔莫及。其實喺冇辦控制對方眼簾嘅情況下，攝影師只可以影多幾張去盡量避免不幸嘅事情發生。當然，同一個5,6人嘅組合影4張，4張都可以分別有唔同嘅人東張西望甚至閉目養神！OK啦，如果你哋係一早約好咗嘅我亦只好欣然接受了！
