首先，會唔會有朋友可以幫手P走碌柱 =p 呢D明信片景色 (如果你覺得唔夠靚，只係因為我影得唔夠好)，係黎自被評為世界六大最美麗的海灘之一，位於峴港嘅美溪海灘。距離市區只係10分鐘車程，而且附近有好多酒店resort同餐廳選擇，所以我地都係揀左可以行到去海灘嘅villa。 夏天嘅時候，可以喺海灘玩水上活動，香蕉船呀，潛水之類，但因為我地去嘅時候係冬天， 所以就收哂檔lu。 唔係旺季黎講，人流少少地，其實仲舒服。 行完海灘，就好精心咁隨便揀左間local餐廳食番個越南河。經過我一番粉飾之後，佢已經由一碗越南河變左一碗加左辣嘅越南河。HK$10左右就食到正宗越南風味，抵食! 莞爾又好，香菜又好，芫茜都好，無論佢化身成為咩名，都唔會改變我對佢嘅恨，而且越南菜入面佢又老是常出現，於是出發前特登整左呢張international 走茜卡 save左喺電話度，點菜時出示，緊要過coupon! (會繼續update多國語言令走茜卡更加走向國際化，各位同好，共勉之!) 食完野就call Grab (或者Uber) 出市區，都係HK$20左右。 峴港市區有兩個market最出名，一個叫Con Market， 比較多本地人去 ; 另一個叫Han Market，傳說中係靚仔D，多D遊客去嘅。我地兩個market都去左之後，其實一睇就知你係遊客黎講，去到邊個market都係不斷俾人叫你買野。 地理上: 組合A: Con Market + Big C Supermarket (過條馬路就係) 組合B: Han Market + 粉紅教堂 (5分鐘內路程) 組合A同B中間其實差1km左右，係行到過去嘅，有時間就去哂啦。 相比之下，個人覺得Con Market係比較多野睇，有food court、衣物、家品、零食手信，而且Big C就喺對面，買包裝越南河做手信一流! Con Market 喺Con Market入面見到D好似基因突變大過拳頭嘅牛油果，上網一search，應該係叫危地馬拉種嘅牛油果，而平時我地喺香港見開嘅係墨西哥種。 圓菇碌牛油果 (危地馬拉種) 雖然油分冇咁高，但勝在果肉厚而滑身，我地試左下面呢杯新鮮牛油果肉+椰子雪糕+焦糖脆脆甜品，都幾特別，係我地會比較少喺香港食到嘅配搭，值得一試! Con Market 對面就係馳名嘅Big C Han Market - 驟眼睇似大左嘅香港葵廣地下嗰層 =p 粉紅教堂黎講，都係一個IG PO相熱點....um....就係咁。 行埋市區，就出發去機場番香港喇~ 更多遊記喺 https://www.uncle7world.com/category/all/travel/
