陳生下星期一生日啦! 禮物呢，都送左咁多年，今年真係唔知送咩好啦…又冇乜錢~~ 前排過返數俾佢時冇計清楚就亂咁過左條數俾佢，事後發現原來我過多左千幾蚊過佢~~ 於是我就話當生日禮物啦~~哈哈哈哈~~好在佢都冇怪我冇誠意 (應該!!) 以前後生時都有心機整下餅或者小甜點俾佢，近年少左好多啦，又好似真係懶左d嘅~ 加上依家一齊住，好難俾到驚喜佢啦，唔通o係佢面前整咩~~ 一整起上嚟好混亂架嘛，屋企又細喎，佢阻住我整都唔好啦~ 咁o岩今次佢突然間要返大陸幾日工作，我就有時間整啦~ 屋企冇焗爐就整唔到焗蛋糕啦，所以都係整返後生時最拿手果款 ---- Mango Cheesecake!! 尋晚放工同阿媽搵保險先生傾完野，就車轆腳返去買材料! 買完其實都成10點啦…拿拿聲開工! 材料如下圖 ： mango x 6 (其實3個都好夠) dup碎的消化餅粉末 魚膠粉 x 3 teaspoon (加入1/2 cup熱水整溶佢) 一舊cream cheese 一罐whipped cream (超方便! 開蓋前shake shake shake就可以!) 糖 牛油 做法： 1. 先將cream cake室溫放軟 2. dup 碎消化餅， 3. 將整溶的牛油加落餅碎，於兜底壓平，有oven可以焗一焗，冇就入雪櫃雪一陣 4. 切mango做粒，部份壓成蓉 (我預3/4)，待用 5. cream cheese加入糖拌勻，再加入已加熱水整溶的魚膠粉、cream、mango蓉，搞到佢地濃情化不開! 6. 加入mango粒，增加咬勁 7. 拎返兜餅底出來，倒入上個step果份"漿"，入雪櫃2-3小時食得! 其實真係唔難整，係切mango耐左d…6隻呀…成手mango味~ 又搞到周圍都係mango汁… 我以前仲試過整唔同的無聊version，包括中間加一層棉花糖、中間加一層jelly、面頭加一層jelly…大家可以發揮創意，咁咪可以同一款cake玩好耐囉~~哈哈哈哈~~ 仲有，d材料都幾貴，加埋成舊水…整左2底，即係每底 $50 搞左個幾鐘，終於入雪櫃~~~~ 然後就抹返個微波爐啦洗工具啦掉垃圾啦…好攰! 本來想洗衫都放棄左… 都唔知點解以前可以成日整…做學生真係得閒好多… 今晚等陳生返來就可以食~ 我仲買定餸今晚煮飯tim~ 尋晚msn話左俾佢知，佢好開心呢~~希望依個cake好味啦!!
