話說上回講到我過唔倒江仲差啲凍傷,呢篇就係接住落去講哈巴羅夫斯克發生既野,題外話,好勒好勒,都係做番阿托算吧！ 由於前日過江失敗,第二日晨咁早起身食個早餐就再黎去挑戰,講起早餐,真係唔可以唔贊下呢間酒店，呢間酒店既早餐係我呢程入面食過最好最豐富既,除左一般俄羅斯早餐會有既甜粥,湯,pancake之外,竟然仲有魚子同香檳,雖然唔知放左幾耐,一向去旅行驚食生野怕肚屙既我都要試一試…好咸== 呢間酒店真係值得一住,唔太貴之餘又方便,酒店係機場去市區架電車既終點站隔離,一落車就見倒,附近又有間開得好夜既超級市場,最重要既就係係黑龍江隔離,個view超靚！ 酒店後花園 食飽就要起行勒,經過前一日我決定加厚裝備,著一對排汗襪加兩對uniqlo保暖襪,一對皮手套加對滑雪手套,笠頂雷蜂帽再加個護耳罩,著到成隻糉咁,若然咁都頂唔住,去到冰地獄雅庫茨克實仆硬街。 搞掂曬拿拿聲衝落江,的確咁著啲手腳係無沉日咁覺得凍,可惜啲風依然咁大,每吸一口氣都好似食支激威扯落肺一樣透心涼。由於太早過江,無咩過江既人,唯有跟住啲人留低既腳印一步一步咁行過去。不過問題就黎,行到半路大部分腳印都俾啲風吹走左,得番啲雪麥春都睇唔倒。不過都行左一半,焗著頂硬上,點知行行下成隻腳插左落雪度,個心離左一離,諗起沉日有個釣魚佬手指指依依哦哦示意我唔好亂行，可能話啲冰唔穩,唉呢鑊仆街啦,好幾年前係尼斯湖踩落泥坑都無呢鑊咁驚。無幾耐回過神第一時間慢慢伸番隻上黎,再拎轉行番自己行過既腳印,去番比較實既冰度,再睇睇周圍,睇左陣,終於搵倒方法過去,原來呢度啲人一早將啲樹枝插左係啲實冰上面,跟住行應該無死,但啲雪積左唔少,遮左大部分樹枝,本住點都要過到去既精神,沉住一步一步跣過去。 救星！ 有驚無險終於行到過去,即刻搵個位擋擋風,頭先太驚險搞到手心出曬汗焗到變冰搞到好鬼凍,咁岩見倒有兩個阿叔係度鑽木取火,第一時間走過去趁下,其中一位阿叔見我咁鬼可憐就將袋入面支vodka仔倒曬入暖水壼個蓋示意我飲,大佬照早十點咋唉人地又勝意拳拳所以都係咁二倒少少落口,正當我遞番俾佢,佢好似好唔滿意咁係度嘰哩咕嚕嘰哩咕嚕,又將個壺蓋推番俾我示意我飲多啲,又拍拍個身係度指指鞏好似想講話飲多啲先至暖身,果時我已經行到扯曬蝦,俾佢咁夾一夾啲無明火即刻黎,我接番個壺蓋之後二話不說一野乾撚曬啲vodka去,一滴都唔留俾你吹咩！個阿叔見倒好似有啲唔好意思隨即又係袋度攞件芝士同salami出黎夾埋遞俾我叫我食,玩野飲完先攞啲送酒野出黎,不過好過無我梗係老實不客氣啦。 坐左係火堆度一陣聽佢兩個係度嘰哩咕嚕又唱山歌,好無聊,無耐我就起行,原本想繼續向中國果面行前多少少,不過諗起wikitravel話前面果區有黑熊出沒,淆底所以都行番過去算。 由於vodka既原故,真係幾有效唔係講笑,跟住果半日個身好鬼慶,我既呢程既酒癮都因此而爆發出黎。 To be continued…
