你知道嗎，坐輪椅出街搵食要做吓功課，但其實又同一般人差唔多，都係搵吓食店地址、坐咩交通去。唯獨要額外留意吓食店環境, eg.上網搵吓相片睇一睇...但而家仲多一個渠道，就係睇YT，對食店現場可以preview得更具體，所以而家好鍾意睇搵食vlog呢。呢間食店都係睇YT，食日式鐵板燒。通常食呢一類食物都會比較貴，但呢度又唔係喎，仲要喺銅鑼灣，又有日藉師傅，食物質素仲要好好，個人來講呢度絕對係一間高CP值嘅日式鐵板燒店。星期六去竟然有lunch set ，主要有關東煮、主菜、甜品，另外亦叫咗兩份小食。關東煮 有一舊蒟蒻同埋一舊大根：煙韌 vs 軟淋多汁，加少少黃芥辣一齊食，衝擊味蕾之餘，原來咁鬼夾。(set lunch 1) 大阪燒 唔想要飯，所以餡料可以四選二，要咗年糕同埋芝士。超級熱，超好味。 年糕軟心又帶點煙韌，醬汁係好濃厚嘅但又唔會令人覺得漏滯，紫菜碎係自己加，落咗好多 🤣(set lunch 2)豬肉薄燒定食 呢個有驚喜！望見海量嘅蔥粒已經好興奮，啡色嘅醬汁係平時食吉列豬扒果種汁。 薄薄一片豬肉配以一塊煙煙韌韌嘅魚糕(?)咬落有啲似韓式湯魚糕嗰種質感，加埋少少脆米、蔥粒，送飯好正。嚟到鐵板燒店，點可以唔食燒物。於是叫咗一份燒牛舌，好正。 燒得剛剛好，點少少柚子胡椒已經好夠味，旁邊嘅椰菜絲蔥絲都清埋🤤🤤最後要多一份芝士蛋奄列 芝士量真係好澎湃！奄列夾起好軟身，蛋味有嘅。呢個奄列一般般啦，未係去到必食咁囉。食咗咁多樣嘢，質素亦好好，總消費$320左右，真心覺得好抵食😋😋‼️♿️ 食店係商廈，入口係平路，搭升降機上去就可以。店內空間亦好足夠 有齊吧枱同埋矮枱。 容納兩至三部輪椅應該問題不大，去之前最好電話預約。 .....Kozy Okonomi-yaki Teppan-yaki (銅鑼灣)銅鑼灣軒尼詩道499號永光商業大廈9樓
