淺月係自己嘅搵食bucket list有一段時間喇,終於膽粗粗whatsapp食店老闆book枱 & 同佢講自己係坐輪椅嘅。同時都打定輸數,有機會係唔成功,始終係小店嘛,輪椅入唔到都可以理解嘅。估唔到,估唔到,估唔到老闆話OK!😳😳各位輪椅朋友,假如想去嘅話,試吓問吓😉‼️♿️ 食店只serve晚餐,6pm開舖。老闆比我book 5pm做第一枱客(感激感激) 食店嘅大小已經係相片show哂出嚟,的而且確唔大,我輪椅嘅闊度係26‘’,剛剛好入到。 食店只有老闆一人打理,由招待、menu介紹、落order、煮食、到埋單收錢、清理枱面都係一個人搞掂,真心佩服,大家要比啲耐性呀!今次叫咗2樣:大阪黑咖嘢厚切豬扒飯 - 第一次嚟當然要試招牌菜先啦!賣相好得!最正係咖哩一啲都唔甜,仲要好辣吓,係辛辣果種辣,食得過癮!咖哩汁濃郁但仍食到蛋香,有滑滑嘅口感,但又唔會過濕。豬扒係來自日本北海道,炸得靚嘅 但肉質有啲乾而且偏瘦,呢part就有少少可惜。不過,整體係好食嘅。沖繩金胡麻豚肉鍋 - 大大嘅一鍋!非常燙手,要小心鍋邊。湯底係常見嘅鰹魚味,飲落係舒服嘅。蔬菜類最正,夠新鮮,吸哂湯嘅精華。 底層有烏冬,麵條好滑,如果可以增加彈牙口感會仲吸引。至於豚肉呢,偏瘦,有少少柴口,浸住湯一齊食會好啲。其實佢仲附送一小碟胡麻醬,不過作用不大,一來芝麻味唔夠香,二來,mayo嘅酸較強,唔太食到芝麻醬嘅吸引之處。大家嚟到,記住要飲杯麥茶(自助形式),好好飲㗎! 最後要再一次多謝老闆,令我有機會體驗小店的特色之處,地方細細,但所有嘢都好齊備!尤其老闆不嫌其煩咁幫我搬開枱枱櫈櫈,又好親切。當然我都好識做,小心駕駛,無撞爛人哋啲嘢啦🤣😌😌😌口味嘅嘢好個人嘅,最緊要想試就去試,你又會唔會去試呢?.....📍淺月 (大角咀)大角咀鐵樹街54號地舖