幸亭拉麵 (灣仔) 幾經辛苦終於睇到《十年》，肚仔餓搵嘢食，行行下見到呢間拉麵店勁有日本feel就入左去試吓。 灣仔電腦城(地鐵A4出口)行大概5分鐘就到，成間店分為室內同室外，室內空間比較狹窄，而且有一級樓梯，輪椅比較難入去，相比之下，室外的位置係後巷，比較寬敞舒適，但衛生就一般。店職員亦非常熱心，主動幫忙。 餐牌太多選擇，店職員就介紹左兩個熱門嘅拉麵，黑胡麻拉麵($78)同黑亭拉麵($78)，再叫多左個自家製餃子($26/4只)。 先試左黑亭拉麵，幼麵同軟身，湯底味道適中，有豬骨味。之後嘅係黑胡麻拉麵，芝麻味香濃，但個人比較喜歡黑亭拉麵，因為湯底不會太濃，恰到好處。 拉麵裡有兩片叉燒和一隻流心蛋，叉燒好大片；而流心蛋真係令人超級驚喜，超流心，有蛋香，好味。 餃子方面，皮脆，菜肉餡，味道尚可。 個人認為拉麵非常抵食，因為呢個價錢已經包左大大件嘅叉燒同流心蛋。試過其他拉麵店，價錢相對昂貴，蛋仲要額外加錢，叉燒份量比較少。雖然呢間嘅拉麵普通，甚至比起一啲高級嘅拉麵店遜色，但以呢個價錢，個人認為超級抵食。 很感恩，叫餐不用普通話；很慶幸，小妹我仲可以係本地食日本拉麵。然而，一切非必然，難道身為香港人的您甘願看到電影裡預言十年的香港嗎？若不願，請繼續堅持守衛我們的香港！ 灣仔皇后大道東118號聯發街C2舖 https://goo.gl/maps/AW9Cpjot6WH2 Yuenkei
