《放工快煮系列》電飯煲海南雞飯 呢個簡易版電飯煲海南雞飯食譜我煮過好多次亦fine tune過，簡單方便又好味。平時男友對街外嘅海南雞飯無乜興趣，因為覺得比較淡味。但我整嘅版本佢就好捧場，特別係我自創嘅沾醬，佢大愛 😌！雞肉超嫩滑，油飯又好食。電飯煲真係懶人恩物哈哈 👍🏻。 點擊圖片放大 更多中英食譜： FB：https://www.facebook.com/whatsboomaking2/ IG: https://www.instagram.com/whatsboomaking/ **電飯煲海南雞飯 材料 (2人份)： 米 (二人份量，我用1 1/4杯) 雞湯 (平常煮飯水量約八至八成半，今次約150ml) 雞全髀 2隻 薑 3-4片 蒜蓉 2瓣 乾蔥頭 1粒 切碎 香茅 2枝 薑黃粉 1/4茶匙 (按喜好增減) 醃料： 鹽 1/2 - 3/4茶匙 薑黃粉 1/2茶匙 胡椒粉 1/2茶匙 沾醬： 薑蓉 1茶匙 蔥末 2茶匙 紅辣椒 1隻 切幼絲 (按口味增減) 青辣椒 1/2隻 切幼絲 (按口味增減) 醬油膏 1湯匙 橄欖油 適量 做法： 1. 雞髀除去多餘脂肪，剪走多餘雞皮備用。雞髀洗淨印乾，在背面𠝹兩刀幫助入味及易熟，用醃料醃30分鐘。洗米備用。 2. 凍鑊下雞皮，用中小火煎至逼出約1湯匙油份後盛起稍後再用，加入蒜蓉、乾蔥碎爆香，連雞油倒進已洗米中拌勻。 3. 倒入雞湯，下薑黃粉拌勻。香茅切除底部及粗硬外葉，拍扁以釋出香味，連薑片放上米面，再放雞髀。關上電飯煲，啟動煮飯模式。 4. 雞皮回鑊，續用中小火逼出所有油份至香脆，盛起備用。下薑蓉、蔥、辣椒爆香後盛起。下醬油膏、混和鑊內雞油 (或按需要加適量橄欖油) 小火加熱，混合薑蓉、蔥、辣椒成沾醬，即成。 5. 飯煮好轉至保溫模式後不要開蓋，再焗10-15分鐘至雞髀熟透，移除薑片及香茅，拌勻，撒上脆雞皮增添口感，即成。 小小tips: 1. 煮飯時水量要比平時少，因為雞會出油，如水量同平時一樣飯會太濕。
