《放工快煮系列》某日男朋友同我講佢有約，我即刻決定嗰日晚餐要把握機會，整佢唔識欣賞、平時冇機會整嘅嘢－海膽忌廉汁意粉 😌😌！放工後去日式超市買咗兩盒特價海膽。平時如果喺餐廳點海膽意粉，起碼三、四百蚊，而且海膽份量唔會多。呢個海膽忌廉汁意粉本來我諗住只係用半板北海道海膽，不過試味時覺得海膽味唔夠濃，最後任性地落哂全板，超級足料哈哈 🤣，最後再加咗兩塊加拿大海膽喺上面。係唔係過份咗少少 🤭？呢個意粉真係非常易整，材料亦好簡單，唔洗30分鐘搞掂 😎。 點擊圖片放大 更多中英食譜：FB：https://www.facebook.com/whatsboomaking2/IG: https://www.instagram.com/whatsboomaking/**海膽忌廉汁意粉材料 (1人份，醬汁足夠2人份)：海膽 視乎你想食得幾豪 (今次用哂成盒約150g)意粉 70g清酒／白酒 30ml淡忌廉 100ml鮮奶 50ml蒜頭 1瓣乾蔥 1粒 切碎無鹽牛油 適量鹽、黑胡椒 隨口味 做法：1. 煲滾一鍋水，下1茶匙鹽，意粉按包裝指示減1分鐘煮熟。2. 食物處理器內加入淡忌廉、奶、蒜頭、海膽、鹽、黑胡椒，攪拌至幼滑 (如無blender亦可以用鏟/spatula盡量壓碎海膽再混入醬汁)。下牛油燒熱平底鑊，中火炒香乾蔥後，下清酒煮至略為收汁。3. 轉最小火，加入海膽忌廉汁，間中攪拌，煮至理想濃稠度。4. 加入意粉充份拌勻，讓所有意粉沾上醬汁。如醬汁太thick可加入適量意粉水調較。試味，有需要再下鹽、黑胡椒調味。5. 鋪上額外海膽，即成。 (互相尊重，歡迎分享我嘅食譜，但請註明出處 🤗。)
