雖然未到夏天，但天氣已開始熱！酸酸甜甜嘅檸檬撻最啱呢啲時候食，超級refreshing 🍋！今次成品我好滿意 😌。上次整嘅lemon curd比較酸，今次調整咗材料份量，酸甜比例剛好，而且texture比上次更好，香軟又幼滑 👍🏻！撻皮類似曲奇皮口感，外脆內軟。雪凍後，食前回溫約15分鐘會有微微流心嘅效果，超！級！正！🤩🤩🤩 另外，比起檸檬，我更鍾意青檸嘅味道同香氣，所以呢個食譜用咗兩種檸檬。當然只用檸檬亦完全可以！做lemon curd用白糖比較好，因顏色會有少少影響，但咁啱屋企得返黃糖，好彩最後成品都靚，不過媽咪話有啲似蛋撻，但好好味 🤣！ 檸檬撻唔係容易整嘅甜品，所以整完好有成功感 😎！ 點擊圖片放大 +2 更多中英食譜： FB：https://www.facebook.com/whatsboomaking2/ IG: https://www.instagram.com/whatsboomaking/ **法式檸檬撻 材料 (可做一個8吋撻有餘)： 撻皮： 低筋麵粉 110g 杏仁粉 20g (室溫) 無鹽牛油 55g 糖粉 42g 蛋 22g 鹽 一小撮 雲呢拿香油 1/4茶匙 餡料： 全蛋 120g 檸檬＋青檸汁 100ml 檸檬＋青檸皮蓉 1湯匙 糖 120g 牛油 70g 切小粒 魚膠片 半片 (約1.5g)(可省略) 做法： 撻皮： 1. 室溫牛油放軟，用膠刮翻拌至幼滑，加入糖粉及鹽拌勻，分兩次加入蛋液攪勻。 2. 麵粉加杏仁粉過篩加入牛油糊，攪拌至成一軟團。加入雲呢拿香油拌勻。 3. 枱面鋪保鮮紙，放上麵團，表面再鋪上保鮮紙／牛油紙防黏，用麵粉棍推開至約3mm厚，放雪櫃雪一小時。 4. 取出麵皮鋪平在撻模內，可用手指／玻璃杯輕輕按壓令撻底及邊緣厚薄均勻，用小刀批去模邊多餘麵團。鋪上保鮮紙再放雪櫃雪一小時。 5. 取出麵團，用牛油紙蓋住撻底，加入烘焙石／豆壓住以防谷起。入已預熱180度焗爐焗約15分鐘，移除烘焙石／豆及牛油紙，薄薄掃上一層蛋液，再180度焗5-8分鐘。攤涼備用。 點擊圖片放大 餡料： 1. 魚膠片冰水浸軟後搾乾水份，隔熱水座溶備用。 2. 小火加熱一小鍋水至有魚眼泡 (不用大滾)。蛋液、檸檬汁、檸檬皮蓉、糖加入一碗內，隔熱水 (確保碗底不要接觸到水) 不停攪拌約10-15分鐘至開始變濃稠，加入魚膠溶液撤底攪溶。當混合物可以黏附木匙／刮刀並呈劃痕 (見步驟圖)，即成。 3. 離火，分次逐少加入牛油粒，攪拌至幼滑無顆粒。 4. 檸檬餡過篩倒入撻底，放雪櫃雪最少3-4小時或過夜至凝固，即成。 小小tips: 1. 鋁製烘焙石仔喺烘焙店有售，但其實用紅／黑／白豆等等一樣得，作用係壓住撻皮等焗嗰陣唔會谷起。豆焗完可以重複再用，唔好煮嚟食就得嘞 😜。 2. 魚膠片可省略，個人覺得加咗口感更好。 (歡迎分享我嘅食譜，但請註明出處。)
