《放工快煮系列》之前整過臘腸排骨煲仔飯，今次整豉汁白鱔煲仔飯，又係簡單快煮之選 ✌🏻。早幾日執廚櫃搵返包豆豉 (之前太多嘢我以為唔見咗)，可以自製蒜茸豆豉醬，仲有自家製煲仔飯豉油。白鱔可以請街市魚販幫手劏、去潺同切件，喺屋企簡單沖洗就可以，唔難處理。熄火焗煲仔飯時再炒個菜，30分鐘輕鬆煮好一餐 😎。點擊圖片放大 更多中英食譜：FB：https://www.facebook.com/whatsboomaking/IG: https://www.instagram.com/whatsboomaking/**豉汁白鱔煲仔飯材料 (2人份)：白鱔 半條 切約1cm厚米 1.5杯水 1.5杯醃料：蒜蓉 1茶匙 豆豉 1湯匙辣椒 1隻 切粒蠔油 1湯匙醬油 1/2湯匙米酒 1茶匙糖 1/2茶匙生粉 1茶匙油 少許 煲仔飯豉油：生抽 1 1/2湯匙老抽 1/2湯匙魚露 1茶匙糖 1/2茶匙麻油 少許做法：1. 白鱔用鹽抓醃約5分鐘，沖洗乾淨，徹底印乾。 豆豉略浸後稍為印乾，拍爛／切碎。混合醃料，醃白鱔30分鐘。米洗淨瀝乾，米：水比例1：1，浸最少30分鐘。2. 鑄鐵鍋內掃少許油 (減少黐底同更易有飯焦)，加入米同水，中火加熱至水現魚眼泡，其間攪拌1-2次以防黐底。加蓋，轉小火煮5-8分鐘。3. 放上白鱔，再次加蓋，轉中火加熱約30秒後轉最小火煮約8-10分鐘至米收水，間中移動鑄鐵鍋讓煲底平均受熱。另一小鍋內，混合生抽、老抽、魚露、糖，加熱至小滾，熄火，下麻油拌勻成煲仔飯豉油。4. 熄火，焗8-10分鐘至白鱔熟透。淋上煲仔飯豉油再焗約1分鐘即成。 小小tips:1. 白鱔洗淨後一定要徹底印乾，否則可能會有殘餘腥味。2. 如用其他容易出水嘅材料例如雞肉，煮飯水量要減少。3. 煲大小及爐頭火力 (我用明火) 不同會影響煮飯時間，按需要自行調整，最重要保持小火。
