《甜牙齒系列》 焦糖燉蛋絕對係我最愛甜品之一，脆卜卜嘅焦糖加埋又香又滑捋捋嘅燉蛋係完美嘅組合！😍😋 以前好鍾意食某甜品店嘅招牌crème brûlée，其實喺屋企整成本超低，而且好容易 😉！我自己測試嗰陣一口氣食咗兩個...🤭🤣 今次又乘機做個小測試，就係分別用蒸同焗，試下效果有咩分別。兩種都係用我部蒸焗爐做，結論係口感上無大分別，兩種燉蛋都好滑，雖然蒸嗰啲表面明顯比較平滑靚仔 (見圖)，但其實砂糖鋪面後睇唔到。不過下次我會直接用蒸，因為焗要用水浴法而且時間長啲，蒸相對快靚正。無焗爐一樣做到！ （左蒸右焗） 焦糖部分，分別用咗火槍同匙羹，效果當然係火槍完勝。無火槍的話亦可以試下用明火燒熱一隻金屬匙羹 (小心熱喔！)，再輕輕「辣」落糖表面，或者用焗爐嘅烤功能 (broil，如有)，都可以做到類似效果。 焦糖燉蛋通常只用蛋黃，蛋白可以用嚟整另一個簡易甜品：椰子水燉蛋白 (https://blog.ulifestyle.com.hk/whatsboomaking/4112535/%E7%B0%A1%E6%98%93%E7%94%9C%E5%93%81%E9%A3%9F%E8%AD%9C-%E6%A4%B0%E5%AD%90%E6%B0%B4%E7%87%89%E8%9B%8B%E7%99%BD) 更多中英食譜： FB：https://www.facebook.com/whatsboomaking/ IG: https://www.instagram.com/whatsboomaking/ **法式焦糖燉蛋 材料 (可做4-6小杯，視乎大小)： 蛋黃 4個 淡忌廉 400ml 全脂牛奶 80ml 黃糖 70g + 額外份量 (焦糖部分) 雲呢嗱香油 1茶匙 做法： 0. 焗爐預熱至160度／原氣蒸5分鐘預熱。 1. 混合蛋黃及糖 (拌勻即可，不用過分攪拌以面打發太多氣泡) 2. 小鍋內加入淡忌廉和奶，小火煮至邊緣有小泡泡即熄火。加入雲呢嗱香油拌勻，稍為放涼。 3. 先慢慢倒入少量雲呢嗱忌廉進蛋黃混合物，同時要不停攪拌蛋黃混合物，以免熱力令蛋液凝固。將餘下雲呢嗱忌廉加進蛋液拌勻。過篩1-2次再慢慢倒進小杯內，盡量避免打起氣泡。 4. 如焗，將小杯放入深焗盤內，加熱水至小杯約1/3至一半高度，160度焗25-40分鐘 (視乎容器大小深度)。如蒸，用錫紙封頂，原氣蒸15-18分鐘後焗4-5分鐘 (如隔水蒸，煲滾水後中火蒸25-30分鐘，熄火焗10分鐘)。燉蛋應該表面凝固而中間可以輕微晃動。放涼至室溫後放雪櫃最少4個鐘或過夜。 5. 食用前，燉蛋均勻撒上黃糖，用火槍輕輕燒成焦糖。放雪櫃15-20分鐘讓焦糖變脆，即成。 小小tips: 1. 倒蛋液時一定要慢～慢倒，盡量避免起泡。如果仍然有泡可以用匙羹／隔油網“畢”走。
