我好鐘意飲南瓜湯，有時喺餐廳食飯如果餐湯係南瓜湯我一定揀佢。其實喺屋企煮南瓜湯超級容易又健康！飲完暖笠笠 🤗！其中一部分南瓜我先焗過再加落個湯度打蓉。呢個步驟唔係必要，想簡單啲可以省略。南瓜本身有天然甜味，煮軟後連其他材料直接用嚟打蓉就已經係一個最經典好味嘅南瓜湯。不過焗過嘅南瓜味道會更有層次 😉。 P.S. 我發覺我成日用「超級容易」，但係真嘅，因為我唔鐘意整太麻煩／複雜嘅嘢 🤣。其實簡單菜式一樣可以喺細節位用心思elevate 😎👌🏻！ 更多中英食譜：FB：https://www.facebook.com/whatsboomaking/IG: https://www.instagram.com/whatsboomaking/ **法式南瓜濃湯材料 (4-6人份)：日本南瓜／牛油南瓜 800g-1kg洋蔥 1個 切幼絲蒜頭 2瓣 拍扁蔬菜高湯／雞湯 750ml水 150ml淡忌廉 80ml鹽、黑胡椒 適量新鮮鼠尾草 3-4片 (可省略)百里香 1/2茶匙 (可省略)薑黃粉 1茶匙 (或孜然粉 1/2茶匙) (可省略)芫茜粉 1茶匙 (可省略)甜椒粉 1茶匙 (可省略) 做法：1. 南瓜去皮去籽。其中三份一南瓜裏外掃油，用鹽、黑胡椒調味，放1片鼠尾草，切面向下入170度焗爐焗45-50分鐘。其餘切約3cm x 3cm大小。 2. 鍋內加入南瓜粒、洋蔥、蒜頭、高湯、水、鼠尾草、百里香、各種香料，中火煮10-15分鐘至南瓜粒軟身。熄火，撈起鼠尾草丟棄。3. 加入已烤焗南瓜，連其他材料用手提攪拌器打至幼滑。小火加熱，用鹽、黑胡椒調味。加入淡忌廉拌勻，熄火，即成。 小小tips: 1. 生南瓜超硬，較難去皮及切件，可以用叉插幾下，入微波爐叮2-3分鐘至稍微軟身，更容易處理。 2. 視乎濃稠程度，有需要 (如太杰) 可於步驟3落淡忌廉前加少量水調整；太稀則可以用小火加熱至理想程度。
