我係蛋控!超鍾意食蛋 (皮蛋除外),最最最愛喺日本拉麵上面隻溏心蛋!男朋友知道我鍾意食,好多時會俾埋佢嗰隻我,不過有時都仲係覺得唔夠喉。出面食通常要十幾蚊一隻,其實喺屋企整成本超低,而且唔難整。 溏心蛋始終係半熟,用日本蛋比較放心。室溫蛋比直接從雪櫃攞出嚟煮無咁易爆,另外可以加少少鹽同醋喺水幫助蛋白凝固。滷汁我試過幾個唔同食譜,有啲勁鹹或酒味太重,調較過幾次呢個比例最啱我自己口味。另外浸蛋時最煩係有時隻蛋會浮面,鋪張廚房紙喺面就可以解決,唔驚浸到兩截色 😉。**溏心滷蛋 🥚 材料:蛋 (室溫) 2隻日本醬油 30ml鰹魚汁 30ml日本料酒 20ml味醂 30ml水 150ml冰糖 1湯匙 做法:1. 醬油、鰹魚汁、米酒、味醂、水加入小煲,小火煮滾後加入冰糖徹底煮溶,熄火攤涼備用。2. 另一煲水內加1茶匙鹽及醋 (水位要足夠完全蓋過蛋),煮滾後轉中小火,小心放入蛋,計時七分鐘,間中攪拌一下讓蛋黃置中。3. 準備一碗冰水。七分鐘後立刻撈起蛋放入冰水冷卻。可用匙羹背面輕輕敲碎蛋殼再浸一陣,喺水中就可以輕易剝殼。4. 加蛋入已冷卻滷汁,完全放涼後放雪櫃浸一晚入味,即成。 小小tips:1. 滷汁我會用玻璃樽保留放雪櫃重用一次。再用時要徹底加熱,可以適量添加調味料。更多中英食譜:FB:https://www.facebook.com/whatsboomaking/IG: https://www.instagram.com/whatsboomaking/