男朋友好鍾意飲法式洋蔥湯，其實做法唔難，只係要時間、耐性同臂力💪🏻 ！因為要不斷拌炒洋蔥令佢焦糖化 (caramelized) 而唔燶，起碼要大半個鐘！不過係值得嘅，因為好好味，尤其冬天嗰陣，係非常heart-warming嘅一個湯 😌 **法式洋蔥湯 材料 (二人份)：黃洋蔥、紫洋蔥 各一個橄欖油 適量牛油 20g牛湯 800ml乾身白酒 100ml蒜蓉 1瓣新鮮百里香 1湯匙月桂葉 2塊喼汁 幾滴糖 1茶匙鹽 適量黑胡椒粉 適量法包 2塊Gruyere cheese 隨喜好Parmesan cheese 隨喜好 做法：1. 黃洋蔥、紫洋蔥各一個，順紋切幼絲。不鏽鋼／鑄鐵鍋內下3湯匙橄欖油中火加熱，加入洋蔥絲兜勻，炒至軟身 (約10-15分鐘)。 2. 轉中大火，加入1湯匙橄欖油同牛油，不停翻炒至洋蔥轉啡色 (約15-20分鐘)。3. 下適量鹽調味，加糖，繼續不停拌炒至洋蔥呈深啡色 (約15-20分鐘)。4. 加入蒜蓉略炒1-2分鐘。 5. 加入白酒deglaze，用木匙輕輕刮起鍋底焦化物，煮到白酒蒸發約一半。6. 加入牛湯、喼汁、新鮮百里香、月桂葉，煮滾後加蓋，轉小火煮20-30分鐘。撈起月桂葉，有需要再加鹽、黑胡椒調味。 7. 倒入可焗容器，放上一塊約2cm厚法包，撒上Gruyere同Parmesan cheese，入已預熱220度焗爐焗10分鐘左右至芝士熔化及呈金黃色。 小小tips：1. 牛肉湯可能比較難買到，可用一粒牛味濃湯寶代替。2. 洋蔥一定要keep住每1-2分鐘翻炒，唔係會燶而唔係焦糖化。3. 唔好用不沾／易潔鍋，做唔到焦糖化效果。更多中英食譜：FB：https://www.facebook.com/whatsboomaking/IG: https://www.instagram.com/whatsboomaking/
