終於搞掂呢2個雪櫃. 今日坐下午4點幾機番香港, 所以朝早仲有小小時間係博多附近行下街. 先將行李放係酒店, 之後就出發去食早餐. 一早 Yodobashi 未開門, 已經有人係度排緊隊. 有咩電器要買, 急成咁!? 早餐無咩特別野想食, 係 JR站 見到有間 Delifrance, 環境同賣相都比香港好好多. 食物質素當然唔洗講. 食完早餐行過百貨公司, 又係未開門已經有人排隊, 又想問下, 有咩要買, 急成咁!? 又係排晒隊. 黎到今日既第一站, DAISO, 係香港都幾鐘意行呢種 10蚊店, 入面D野古靈精怪咁, 幾得意. 呢個商場係 JR站 隔離, 其實主要係一個多層既巴士站. 由博多出發既長途巴士, 大部份都係呢度搭. 入面既擺設其實同香港無咩大分別, 不過呢度既 100Yen 店依然係 100Yen. 香港既10蚊店之前因為日圓升值加價到12蚊. 而家日圓平番咁多, 又唔見佢減番價. 成層都係100Yen店, 基本上你諗到既都有得賣. 之後就周圍搵下手信買. JR地下街入面有條博多小徑, 入面有好多日本唔同地方既手信賣. 姐係果D一盒盒, 個包裝靚到你唔捨得拆果種. 不過最後都係睇唔岩, 再去第二度搵下. 行過博多地下街一蘭, 叫到呢D一包包, 好似公仔麵既物體. 諗諗下香港好似無, 就買左2包番香港做手信. 一包5個, 盛惠 1290 日圓. (回港食後感: 味道一般, 個味精湯底完全無一蘭 Feel. 大家可以 Skip 呢樣手信.) 搞掂左手信. 就再搵下街行下. 黎到呢間係 JR 站既 Toyku Hands. 呢間其實係一間類似百貨公司既鋪頭, 不過入面賣既野全部都好潮. 當然啦, 價錢都好潮下架. 入面真係咩鬼都有, 床上用品, 文具, 家電, 玩具, 旅行用品. 大家就當佢係一間加強版既 City Super. 推介大家黎行下. 去到頂樓有一個專為情人節而設既朱古力專賣場. 入面至小有30個唔同既朱古力品牌. 日本係一個好著重情人節既國家. 日劇入面成日都有好多男女之間既愛情,浪漫故事. 相反香港....唔係喜愛夜蒲, 就一路向西. 入番正題, 今日係2月14日, 大批日本妹一早已經係度揀朱古力俾心儀既男士. 成個賣場迫到爆, 可惜這些機會不是屬於我的. 我呢D鄉下仔, 基本上10個朱古力品牌有9個都唔識. 不過呢一個我就一定認得, 事關佢杯朱古力軟雪糕真係好好味. 跟住就更上一層樓, 上到天台. 博多JR站既天台非常特別，有一個神社叫鐵道神社。 呢個係全日本唯一一間係車站上面既神社，所以點都要抽D時間黎參觀下。 神社入面既洗手所 一家大細行完街，上黎晒下太陽咁，真係一樂也。 天台上面有一個觀景臺，可以360度睇晒博多站周圍既風景。 就咁 Hea 下 Hea 下，時間都差唔多。啦啦聲番酒店拎番行李就去機場。 途中係地下街又發現新大陸，即整既卡樂B薯片。 真係即刻炸架，所以由落 Order 到有得食要10分鍾左右。 見頭2個都係博多限定咁巴閉，就點個明太子味試下。310日圓 因為時間關係，要留番去到機場先食，趕左去機場 Check in 先。 搭地鐵去到機場站，一上到地面就見到呢個寫住國際線既巴士站。 認住呢架藍色 Shuttle Bus, 唔好上錯車。 記得第一日落機傻更更，仲諗日本人點解有咁傻既設計。 有碌野係度頂住我放行李入去既。 後尾先發現碌野可以拎起。真係波叔出城。 燈!燈!燈!燈! 大家見到呢張野都估到咩事啦。無錯。 Delay No More! Delay 一個鐘，可接受。 諗番香港黎果時都有 Delay, 但就聲都唔聲，好似奉旨 Delay 咁。 日本既情況就唔同，送張餐券俾你，正好食個 Lunch. 食 Lunch 前解決左個明太子薯片先。新鮮真係新鮮，非常好味。 餐廳果層可以望到停機坪。今日天氣一流，真係唔捨得離開福岡。 基本上，機場既餐廳有3間，食既野都係差唔多。 如果大家好似我咁好彩要 Delay, 但又想食個飯，記住要過海關前食。 因為過左海關就無餐廳架啦。 餐廳A 餐廳B 餐廳C 最後揀左餐廳 C, 叫左個滑蛋豬扒定食。 呢間就係過左海關之後，唯一一間"餐廳", 只有小食賣，仲要企係度食架。 雖然過左關之後無咩野食，但就有好多野買。 化妝品，手袋，酒，有! 香港人去日本一定要買既 ROYCE, 有! 仲好抵，朱古力薯片香港賣成百蚊一盒，呢度700日圓一盒。 經過最後博殺之後，終於黎到閘口。 你知道我在等你嗎?? 5點多，飛機終於起飛了，再見啦，福岡。 第一次黎福岡，福岡俾我既印象好好。 有東京，大阪果種大城市既氣氛。 但同時又有北海道，京都果種既大自然景色。 雖然今次黎左7日都算幾耐，但其實九州都仲有好多景點等住我去。 好似鹿兒島，長崎咁...所以今個旅程上唔到阿蘇火山，我都無咩遺憾。 因為我相信好快我又會再黎九州。
