浸完溫泉特別好訓, 一覺訓到大天光. 梳洗一下, 執好行李, 就準時8點半落樓食早餐. 職員都係安排番坐尋晚既位置. 早餐已經一早準備好晒, 放係檯面. 尋晚果餐都未落晒格, 一早就九大簋咁既款, 真係唔變肥仔就有鬼. 檯面放左個鑊仔, 俾你自己煎雞蛋同煙肉. 食幾生幾熟由你自己發板. 夠晒貼心. 酒店 Check Out 時間係11點, 食完早餐都已經9點幾, 避免一陣行街太趕, 所以都係搞左 Check Out先. Check Out 完之後兩個喼就放番上車, 之後架車就繼續泊係酒店停車場. 拎埋相機就先去附近既金鱗湖參觀下. 住仙洞既好處之一就係極近金鱗湖, 由仙洞行過去都係2分鐘左右. 一早既金鱗湖已經有唔小遊客, 大家都忙住搵個靚位影相. 我發覺九州呢個地方都幾受韓國人歡迎. 可能係地理上比較接近既關係. (由釜山坐船到九州都係3粒鐘左右) 成個由布院都係阿豬媽, 哦巴...不過就唔多見千頌E, 睇黎靚既韓國女仔都投資晒係整容方面, 唔太去旅行. 金鱗湖以晨霧彌漫的仙景景色聞名, 因為湖既西邊湧出既係溫泉水, 而東邊湧出既係清水. 一冷一熱之下, 溫差令到湖面產生一層簿霧, 現場睇真係仙景一樣. 可惜小弟不材, 相機影到既不及現場咁靚. 欣賞完金鱗湖既美景之後就出發去 B SPEAK 餅店 (B SPEAK 既卷蛋係非常搶手, 尤其是細 Size, 所以要襯10點開門就去買) 一早既湯之坪街道唔算太多人, 可能大家都湧晒去金鱗湖. 10點02分到達 B SPEAK. 雖然遲左2分鐘, 但好好彩, 未算有太長人龍. 所有貨品都有貨. 卷蛋有原味同朱古力味. 我地買左2條細 Size, 一條朱古力味, 一條原味, 咁就可以試晒2隻味. (細條 475日元, 大條1420日元) 細 Size 其實一次已經夠晒2個人食. 如果2個人黎到無細 Size 既話, 我建議大家買條大 Size 原味就可以了. 如果2個人買2條大 Size 的話, 我估食到中秋都食唔晒. 完成呢個 Mission 之後就可以放慢腳步, 慢慢散步去由布院 JR 站. 呢個就係由布院 JR 站對出既風景. 係我認為拍攝由布岳最正既位置. (對出呢個位已經有好多的士泊晒係度, 大家一落 JR 去酒店唔洗愁無的士) 行到JR站就可以行番轉頭, 大家可以參考以下地圖, 咁會易D明白. 今朝我由金鱗湖行到去 B SPEAK (地圖上白滝橋位置) 再行到去由布院站. 以上地圖由由布院觀光網站提供 http://湯布院観光.com/index.html 行番轉頭經過 B SPEAK, 大約10點40分左右. 已經開始見到人龍, 所以大家要買真係要準時, 賣晒就無架啦. 湯之坪街道都變得好熱鬧, 旺過旺角女人街. 再次行過尋日已經試左既和牛可樂餅鋪頭. 雖然好香, 但個肚仲係好飽食唔落, 唯有索番兩啖當食左. 番停車場拎番架車之後就向下個景點 - 士多啤梨放題 進發. GPS 輸入 Strawberry Fields 郵政區號 818-0025 呢個士多啤梨園位於筑紫野市, 即係博多附近. 所以由由布院渣車過去都要差唔多3個鐘頭. 渣到咁上下肚餓起黎, 又唔敢食太多野, 怕一陣食唔到士多啤梨. 所以就搵左間便利店。 買幾件炸雞, 買支野飲, 加埋一條 B SPEAK 卷蛋做午餐。 終於見到神之卷蛋既盧山真面目. 唔算太多 Cream. 老實講, 賣相一般, 味道都係一般, 無傳說中咁"神". 我覺得係食個"名"多D. 就好似國內同胞鐘意黎香港食許留山咁, 都係食個"名". 渣左差唔多3粒鐘, 終於到左 GPS 所講既位置, 但發覺有小小唔對路. 住宅區黎既, 全部都係屋, 完全唔覺有農場. 即刻上番士多啤梨園既網站, 好彩搵到一個固定電話 092-400-3239 輸入之後就似樣D, 起碼地圖上顯示既係一片田園. 而且距離而家位置唔遠. 再渣左10分鐘左右就到左福岡 Strawberry Fields 如果大家想黎呢度摘士多啤梨, 要先網上預約. 可以到以下網站預約 - http://1515.itigo.jp 預約方法可以參考以下網址 - http://www.fukuoka.com.hk/archives/1771/ 基本上任摘一小時, 旺季期間 1900 日元一位 (12月2日 至 5月6日) 淡季期間 1400 日元一位 (5月7日 至 5月31日) 呢度既職員都係後生仔，一般簡單英文溝通不成問題。 入到去, 開番封預約 email 俾職員睇，跟住會俾一張 Form 你填, 都係填番地址,電話,名果D.... 跟手職員會俾一把較剪, 一個膠袋你. 會同你一齊入溫室教你點樣摘, 同埋點樣揀甜既士多啤梨. 摘就好簡單, 係士多啤梨粒"定"上面剪一剪就OK, 千其唔好用手扯, 會扯爛成棵士多啤梨. 之後食剩個"定"就放番入膠袋, 唔好隨便放係地下就算. 要保持溫室清潔. 職員會話俾你知邊幾個館可以摘, 今日可以摘 1, 2, 3號館既士多啤梨. 呢度係其中一個館, 超大間, 任摘任食. 職員話唔好睇呢種生得樣樣衰衰咁, 其實好甜. 職員教曉我地點摘之後就番番 Office 做野, 之後我同太座就開工食士多啤梨同影相. 突然間有一個戴 CAP 帽既叔叔示意我地跟住佢, 佢唔識英文, 只係不斷講日文. 佢帶我地穿過一間又一間既溫室, 溫室入面又無其他人, 又唔知佢做咩, 想起當年德州電鋸就係咁. D女仔跟住個農夫入左森林就....... 跟住去到最入果間溫室, 佢就摘左一粒士多啤梨俾我地試. 原來佢想我地試下其他品種既士多啤梨. 呢一種比頭先摘果種"怪獸型"細粒. 有一種好得意既香味, 有D似香水咁. 香味好濃, 但唔算太甜. 我同太座都係鐘意食"怪獸型"果種, 貪佢夠大粒又夠甜. 所以同CAP帽叔道謝之後就番番去第一間溫室. 去番第一間溫室見番頭先第一位職員, 佢好熱情咁幫我地摘左好多士多啤梨, 話俾我地知呢D好甜. 塞到我地成手都係. 日本人真係好好客!! 食到悶悶地仲可以玩下其他花臣, 朱古力噴泉!! 其實一個溫室入面佢會"界"左幾行俾你摘, 有幾行就會封住左, 等入面既士多啤梨可以休養生息. 咁到聽日其他人黎既時候就有靚既士多啤梨摘. 所以好多時都會見到隔離果行有好多"紅卜卜"既士多啤梨. 但大家放心, 佢開放俾你果幾行既士多啤梨都已經好靚同夠晒你食. 大家要守規矩, 唔好飛象過河摘隔離果行. 食左45分鐘已經飽晒, 士多啤梨當飯食, 咁大個仔都係第一次. 食飽左又係 Shopping 時間. 呢個士多啤梨園離鳥栖 Premium Outlet 好近. 渣車都係20分鐘車程左右. GPS 輸入電話 0942-87-7370 呢個 Outlet 主打係名牌子, 價錢黎講唔算非常吸引. 我覺得如果行程太緊既話, 可以 Skip. 點擊圖片放大 行左2個鐘左右就閃人, 要8點之前番博多還車. GPS 輸入日產博多新幹線站前電話 092-471-1634 本身預左2個鐘頭渣番博多, 諗住實食無痴牙. 點知臨入博多市有小小塞車. 搞到時間有小小趕. 還車之前要先打爆個油缸, 是但駛左入個油站. 點知呢個係自助油站, 係日本入咁多次油, 第一次去無職員幫手既油站. 但時間又緊迫, 頂硬上啦, 人生總有第一次. 其實過程都唔算複雜. 揀番入 Regular 油, 入錢, 拎油槍, 插入去油缸, 彈槍, 掛番起支油槍, 找錢, 走人. 渣左3日先要入一次油, 慳油都喊. (2664 日元) 姐係173蚊港幣左右, 一日60蚊都唔駛!!!! 番到博多, GPS 帶左我去一條後巷, 又老點. 見唔到日產既招牌, 仲有15分鐘要還車!!! 渣車兜左一圈都唔見, 唯有落車用腳圍住附近跑下睇下. 最終都係8點前搵到, 原來間鋪係大街, 唔知點解 GPS 點我去後欄. 還車了, 辛苦晒呢3日帶左我地去咁多地方. 還車後先將行李拉番酒店先, 之後先去食晚飯. 黎緊呢3晚都會住 The B Hakata. 係正 Yodobashi 斜對面. 行去 JR 站都係5分鐘左右, 位置算係方便. 間房一眼睇晒, 東橫 INN 今次有對手了, 難得有酒店間房仲可以細得過東橫 INN. 舟車勞頓左一日, 都唔想去太遠食晚飯, 就近近去 JR City 10樓 食一風堂. 叫左個白丸元味加隻蛋. (盛惠 780 日元). 我個人都係鐘意食一蘭多D. 食完都9點幾, 好多鋪頭都關晒門. 唯有番酒店. B SPEAK 卷蛋其實最好買完幾個鐘就要食. 因為打開入面有包乾冰保鮮. 到我夜晚打開呢個原味做霄夜既時候, 包乾冰已經溶晒. 呢個錯誤示範大家唔好學.
