本黎今日係 Plan 左去阿蘇火山同九重夢大吊橋, 但因為阿蘇火山仲封緊, 所以就改去九州野生動物園. 大家想 Check 住阿蘇火山既情況可以去下面既網址, 暫時係火山口一公里以內不能進入. http://www.kyusanko.co.jp/aso/ 因為今日既車程比較遠, 所以未到九點鐘就已經出車. 去第一站九重夢大吊橋. 係 GPS 輸入電話 0973 - 73 - 3800 尋晚就係泊呢種"電梯式"既停車場, 有一定難度, 要渣埋部車入電梯, 對正條坑先OK. 不過日本人為左慳位, 大部份市區酒店都會用呢種泊車方法. 係日本渣車, 只會係超趕時間既情況下, 我先會揀行 IC (收費快速公路). 因為我認為係日本渣車係一種享受, 渣國道, 山路可以睇到更多靚既風景. 去到更多遊客去唔到既地方. 由熊本去由布院一帶既景點, 如果唔行 IC 就要翻山越嶺, 話咁快就開始上山了. 渣左一個小時多, 去到深山, 開始就進入白色世界. 好似去左北海道渣車咁. 見到白茫茫一片, 當然興奮, 見到有個停車位就駛埋一邊, 影下相咁. 影完相, 諗住繼續出發, 就出事了. 架車不斷打滑, 向唔到前行. (睇番相見到其實地面已經結左冰) 已經地板油左幾次都唔得. 可能有小小暗斜, 入後波向後又OK喎. 但向後都唔係辦法, 因為後面唔夠一個車位有架車停左係度, 頂住左, 司機又唔知去左邊. 之後無辦法啦, 又入番波向前試下咁. 咁今次好小小, 唔知係個轆破開左D冰, 定係搵到一個無結冰既位. 向前有小小反應. 即刻俾多2腳油, 渣番上馬路. 真係好彩, 果度荒山野嶺, 等人救都唔知等幾耐. 之後再渣就非常小心, 唔敢再亂咁停埋一邊. 雖然咁驚險, 但其實山區既馬路既路況都係好好, 都無結冰同積雪. 所以之後都無諗過去裝雪鍊. 係到九重夢大吊橋之前有一段小路有積雪. 但小心慢駛都唔係太大問題. 有驚無險, 再渣多半個鐘頭, 搵到個停車場, 放下水, 定下驚先. 呢個係其中一個登山口, 所以好多登山人士泊左架車係度就去行山. 由熊本出發, 渣左2個半鐘車, 終於到左九重夢大吊橋. 九重夢大吊橋高173米, 全長390米, 係日本最高, 最長既行山專用橋. 泊好架車就買飛過橋 (泊車免費, 過橋費 500 日元） 橋上風景真係好靚，但唔好睇咁好陽光，其實現場係好大風好凍。行完之後隻耳仔係無左感覺。 我行15分鐘都凍成咁，真係要俾橋上面D保安10個 Likes，我估佢地一企就至小幾粒鐘。 你睇下D人幾細粒，條橋幾大條，真係好壯觀。 順帶講下，條橋每邊都有一個入口，而你俾既500日元已經包左來回程。 你由一邊行去另一邊，職員會先幫你蓋個印，當你回程既時候，就會再蓋另一個印。 參觀完大吊橋之後就出發去九州野生動物園。 GPS 輸入電話 0978 - 48 - 2331 車程唔算遠，一個小時左右，中途會先經過今晚住宿既油布院。 動物園既入口好似過紅隧，有個收費亭。你渣車入去既時候要買埋入場卷，同時佢會問你買唔埋野生巴士卷。 如果買巴士卷，佢會約定你上車時間，咁就唔怕無位。(入場卷 2500 日元，巴士卷 1100 日元） 要參觀九州野生動物園有2種方法，如果自駕既你可以選擇渣埋自己架車入場，隔住玻璃睇獅子老虎。 而另一種方法就係坐佢園內既巴士，呢個方法既好處係可以餵埋動物食野。 因為我都想試下餵動物，所以選左後者。 去到動物園都成1點，咁我想食個午餐先，所以就同職員 Book 定坐2點鐘既巴士。 之後就去動物園 Canteen 食左個炸蝦餅烏冬醫下肚先，賣相一般，但味道唔錯。 到差唔多2點，就行過去巴士站等上車。呢架就係我地要坐既"老虎狗"號。 我稱佢為"老虎狗"號，係因為除左老虎狗，我諗唔到佢似咩動物 題外話，唔知大家有無睇過一套西片叫活死人凶間 - Dawn of the Dead? 我可以大膽講一句，呢架巴士既設計係完全抄緊套片入面既 Concept. 俾張劇照大家睇下. 如果大家有興趣可以睇埋段片, 因為同一陣入動物園所發生既情況都非常雷同. https://www.youtube.com/watch?v=SB4SyMKugU8 講番正題, 上車前, 職員會派一盤食物俾大家. 職員見我地唔識日文, 好細心咁用英文同我地介紹一次邊樣食物餵邊種動物. 蜜柑係餵俾長頸鹿食, 肉就當然係餵獅子. 左上2粒細細既啡色既係餵黑熊. (龍船咁大隻黑熊食呢2粒野??? 食幾多粒先飽!!!) 下面果舊蕃薯係比大象食. 而其他草食動物好似 鹿,羊,駱駝 就食綠色一碌碌果粒野. 入到巴士就可以揀個位坐, D膠板有一格格窗俾大家打開, 唔同高度既動物, 打開唔同高度既窗去餵就可以了. 一開始大家都好開心, 玩下手機, 自拍下咁, 樂也融融. 幾分鐘後就大獲了, 成架巴士變成一個阿修羅場. 獅子係窗外面係咁咆哮要食物. 細路開心大叫 女士們花容失色. 職員繼續講解. 我不斷心理輔導側邊既太座, 佢先肯大膽餵左2舊肉. 其實獅子唔食人既時候都幾可愛架, 你睇下. 呢個動物園有好多野生動物, 可以咁講, 你諗到既都有. 老虎無得餵, 所以佢地都無興趣行埋黎. 俾野生動物參觀左50分鐘之後. 我地終於係個巴士籠入面走番出黎. 之後就去動物接觸區, 摸下動物. 呢度既動物種類唔多, 但勝在好多都好特別. 首先去袋鼠館. 真係好正, 之前去悉尼既動物園, 都要隔住玻璃睇袋鼠. 呢度就夠晒 Free. 可以同佢地零隔離接觸, 任你摸. 再講多次, 係袋鼠任摸. 大家唔好諗多左. 我懷疑呢幾隻係人扮, 企係度都訓著既!!! 除左袋鼠仲可以摸下呢D熱鬥小馬 行下玩下, 動物園都差唔多關門了. (冬天開到4點, 好早收) 之後就向今晚既溫泉酒店 - 仙洞 出發. GPS 輸入電話 0977 - 84 - 4294 中途見到咁靚既風景, 忍唔住叫太座即刻駛埋一邊, 落車影下相. 自駕既好處就係咁, 想停就停, 無驅無束. 有時人生都係一樣, 每日匆匆忙忙咁, 好易會忽略左身邊好多美好既事物. 尤其生活係香港, "停下來" 已經係一種奢侈品. 好多人都喜歡旅行, 但我認為懂得享受旅行更加重要. 對於我黎講, 能夠放慢腳步, 不拘泥於行程, 隨遇而安就算係一個真正既旅行. 所以我既行程表上從來都唔會有時間, 只會記低當日要去邊D景點. 邊度好玩就會留耐D. 而且一日最多都係安排2-3個景點, 不走馬看花. 渣左半個鐘頭車就番到由布院. 仙洞 GPS 其實都好準確. 只係由布院既路真係好窄, 搵左一輪先搵到停車場入口. 今晚住既係洋室, 位於2樓. 呢個就係女士們既溫泉百寶袋, 最正係對腳趾襪, 咁就唔洗擔心著唔到木屐啦. 除此, 仲有貼心既 Welcome 糕. 窗外風景唔錯, 仲可以看住架車添. 仙洞既外觀, 雖然睇落好簡樸, 但真係住得好舒服, 值得推介. 入住既時候, 職員會約你幾點食晚餐, 有6點同6點半揀. 見唔太肚餓就揀左6點半. 時間尚早, 就去附近既湯之坪街道行下. 由布院有好多特色既商店, 如果要細心行晒, 真係一日都唔夠. 日落, 由布岳, 電線桿, 正! 經過咁出名既和牛可樂餅鋪頭, 忍唔住要買番個試下. 勁有牛味, 如果各位都係牛魔王既, 就一定要試下. 因為時間關係, 無行到去車站, 行到中途呢間勁出名既 B Speak 蛋糕店就折返番酒店食晚餐. (B Speak 開門時間係 10:00 - 17:00, 所以我行到去已經收左了) 到左今晚既重頭戲, 地雞鍋晚餐. 料理長好有 Heart, Menu 上面有我個名. 一開始就係前菜, 小食, 細細件咁, 好精緻. 仲有一杯餐前梅酒, 凍冰冰好好飲. 之後就到燒物, 鹽燒河魚, 呢道有小小咸. 之後下面果碗就係蒸雞, 呢道好好食. 上面果盤就係今晚主角地雞鍋, 簡單講, 姐係打邊爐. 地雞唔似我地一般食果D雞, 質感好似脆肉鯇咁, 脆脆地, 好特別. 食到咁上下, 職員就問我地個飯要就咁一碗, 定係加落個湯度變泡飯. 咁打邊爐個湯咁正, 當然揀泡飯啦, 食完呢味已經飽左9成. 最後就係甜品, 柚子雪糕. 呢個雪糕真係不得了, 未食過咁好食既雪糕. 最後最後, 職員仲怕我地唔飽, 俾左2個飯團我地做霄夜. 大佬, 我飽到上頸, 邊食得落. 同職員約埋聽朝8點半食早餐就番上房準備浸溫泉. 呢度係溫泉對出既休息區. 仙洞有2種溫泉, 分別係露天溫泉. 同埋家族溫泉. 家族溫泉姐係私人溫泉. 俾人成家入去浸既. 總共有6間. 入去, Lock 門, 之後間房就任你浸. 開頭都怕會唔會無位呢, 點知去到6間都無人, 任揀. (間間裝修有小小唔同) 呢個係我浸果間. (順便提番, 間房入邊係無浴室. 只有馬桶同洗手盤. 所以基本上你沖涼既話都要落去浸一浸溫泉. 如果你勁到可以係洗手盤沖涼就另計) 休息區既設備, 有 Locker, 中間果部機有茶, 有咖啡, 有水. 最右果部就緊要, 生啤機, 仲要任飲, 夫復何求!!! 浸完溫泉, 加對左唔知幾多杯生啤之後就周公急 Call 了.
