早上9點正式離開酒店出發. 開始去搵下今日間租車公司先. 出發前已經係酒店食飽早餐, 東橫INN既房價都包左簡單既早餐. 通常都會有飯團, 腸仔, 咖哩飯, 麵豉湯. 講真, 絕對講唔上豐富. 但唔知點解就係好鍾意食日本嬸嬸親手包既飯團. 果份人情味第二度係食唔到. 行左10分鐘左右. 眾裡尋"它"千百度, 終於搵到你. 唔係講緊果個女仔, 更加唔係個阿叔. 而係間租車公司(日產) 其實之前幾次日本自駕都會揀 Toyota, 貪佢D車夠新, GPS又夠Update. 今次揀日產, 係因為網上訂既時候, 日產可以揀跟"雪呔". 點知訂完之後, 日產 send email 俾我話無雪呔. 但可以提供雪鍊. 老老實實, 我識鬼裝咩. 不過有好過無啦, 起碼心理上好D. 以下係租3日車既費用 租車基本料金: 16100日元 免責補償: 3600日元 NOC: 1500日元 雪鍊: 1500日元 消費稅: 1816日元 總共: 24516日元 關於咩叫免責補償, 咩叫 NOC. 請參考 http://www.travelclassroom.net/2011/05/japan-car-rental-insurance.html 一切準備好，上齊行李，準備出發第一站，太宰府天滿宮! 係GPS輸入太宰府天滿宮電話 092-922-8225，預計大半個鐘到達。 話說渣緊去太宰府天滿宮途中，我發覺...做咩窗外面咁大塵既。 睇真D白色既......大鑊，落雪。 去到太宰府天滿宮，泊好架車 (500日元 2小時)。 一行出去就咁樣樣。邊個話九州只有山區先落雪架!? 我今日正式要推翻呢個言論! 雖然落雪好凍，但好彩都帶夠衫，繼續行程。 進入太宰府之前既商店街，基本上10間有7,8間都賣緊太宰府名物。梅枝餅。 我地見間間都差唔多樣既，就是但搵間買左2個。(120日元一個)。味道都唔錯。 行多兩步就發現有一間睇黎特別出名。因為好多人排隊。係正 Starbucks 對面。 大家有興趣可以試下，斷估會好味D. 講下間 Starbucks, 呢間 Starbucks 係由名建築師隈研吾設計。 我本人都覺得好特別，不過內心始終覺得..... 好似我平時買外賣果堆木筷子. Sorry Sorry, 設計既野我確係識條鐵Only. 再行入小小，經過呢條紅色既太鼓橋就算正式進入太宰府。 一早就已經人山人海，今日已經係平日，如果係假期既話，怕會逼人過黃大仙。 太宰府天滿宮係日本全國天滿宮既總本社。主要係祭祀有學問之神之稱既菅原道真。 相傳菅原道真去世既時候吩咐要用牛車運送佢既遺體。而牛車停係邊，就將佢葬係邊。 咁果時牛車就係停左係太宰府天滿宮既位置。所以後來大家都為呢隻牛修築一個銅像。 據說摸一摸佢個頭就會醒D架。所以你見佢個頭已經俾人摸到唔同色。 其實呢一隻已經係我好彩係暗角見到，無咩人發現，先影到相。 正門都有一隻御神牛，果隻唔好話摸，俾人圍到見都見唔到咁濟。 呢個就係本殿 岩崎春，奸巴爹! 呢個繪馬有隻羊既!? 唔通因為知道今年係羊年? 好多學生哥黎呢度買御手架。睇黎應該好靈驗。 參觀完太宰府天滿宮，就順道參觀埋天開稻荷神社。 沿住大路行就見到，好易搵。 呢間稻荷神社都有唔小紅色鳥居。雖然比較起京都伏見稻荷神社既千本鳥居略有失色。 稻荷神社主要係求農作豐收，生意興隆。 所以好多公司或者個人都會捐錢起鳥居。之後鳥居後邊就會寫上捐贈者既名。 估唔到北海道既朋友都會捐錢係九州起鳥居。強! 狐狸視為稻荷神既使者，所以神社入面有唔小狐狸既擺設，連繪馬上面都有。 參觀完天開稻荷神社就繼續南下去熊本, 參觀熊本城. GPS 輸入熊本城二之丸停車場電話 096-356-3837 前面呢架就係將會陪住我地呢3日既車仔。真係名附其實既車仔。但2個人坐連埋行李岩岩好。 話說影完呢張相之後，我見沿路交通狀況都良好，就交俾太座接力渣落熊本。(下略3000字） 我只能夠講，我能夠打到呢篇遊記，證明我健在。 預計3點16分到達, 太好, 趕得切熊本城關門前到達. 其實我一直都唔係好明, 點解日本D樹可以生得咁整齊, 好似打機玩 Sim City 咁。 係渣入熊本市果陣塞左一陣車，3點45分到達停車場，泊好架車 (200日元 2小時). 之後急急腳走去買飛。500日元一位。12至2月會比較早關門，收5點。其他月份收6點. 終於一見熊本城, 日本三名城集郵成功. (日本三名城分別為 名古屋城, 大阪城, 熊本城) 熊本城天守閣居高臨下, 可以飽覽熊本市一帶景色. 留意番! 後面山頭好大煙果度就係九州出名既阿蘇火山. 今次行程本身都有 Plan 去阿蘇火山, 但係阿蘇火山由上年起都一直封山. 火山口一公里以內都不能進入. 唯有改變行程, Skip 阿蘇火山, 唯有下次去九州既時候再去啦. 建築物外面都有熊本 ICON 熊本熊. Kawaii. 行完熊本城就順道行埋旁邊既城彩苑櫻之小路, 基本上呢度係一條商店街. 有唔小賣手信既鋪頭. 我地買左小小手信就渣車打道回府番酒店了. GPS 輸入東橫INN 熊本城通町筋 電話 096-325-1045 泊好車係酒店, 放低行李, 就行去食晚飯 今晚晚飯既地方 勝烈亭係熊本出名食炸豬扒既餐廳. 發現有唔小香港人同我地一樣黎朝聖一番. 我點左一個超特選鹿兒島產六白黑豚. (2592日元). 個名夠晒長, 夠晒強. 而實物都確係名不虛傳, 外脆內軟, 真係10個"脆". 我今次去呢間係勝烈亭新市街本店. 個位置有小小僻. 唔係咁易搵. 俾間鋪頭張相同地圖大家參考下. 如果大家坐電車可以坐去辛島町站. 食飽飽之後又係藥店時間, 行下新市街附近既藥店. 呢間藥店老闆誇下海口, 話自己係全熊本最平. 即管睇下. (地圖上紫色星星) 點知比較過之後, 轉角果間松本清已經比佢平啦喎. 老板, 你口中既熊本範圍都幾細下. 呢間就係"熊本市外"既松本清. (地圖上粉紅色星星) 行完街之後, 就去超市買生果番酒店食, 黎到熊本, 點都要試下熊本士多啤梨. (799日元) 超甜!!!
