早上8點半左右搭機場巴士到機場, 港龍 Check In Counter 無咩人排隊, 一陣就搞掂. 過埋海關都未到10點. 打算嘆過好既大家樂早餐, 叫左個餐蛋麵, 點知非常難食, 奶晒野. 見差唔多時間就行去登機閘口, 行到去發現改左閘口, 又行番轉頭. 終於都搵到你. Delay 左成粒鐘, 12點鬆左右終於起飛. 機長如常報告當地天氣, 通常大家都會聽到唔係晴天就係落雨. 但機長話當地天氣 Windy. 開頭都覺得怪怪, 但都不以為意. 之後就係飛機餐時間. 港龍既飛機餐質素. Um...你懂的! 唯一值得一讚既就係有 Haagen Dazs 雪糕 同埋 太興港式奶茶提供! 飛左三個鐘左右, 差唔多到降落既時候, 就知點解機長會話 Windy. 我地架飛機去到離地一千米左右就已經搖得好厲害. 隔離位有個跟團既師奶已經開始面有難色. 到離地四百米既時候就搖得更加嚴重, 右面窗口就咁望出去可以見到地面既馬路. 到搖另一面既時候, 又可以係左面窗口望到條馬路, 你就知幾嚴重. 呢個時候我都開始淆底. 到離地一百米既時候都仲係搖得好厲害, 果然真係降落唔到, 機師果刻立刻加速抽番部飛機上一千米. 之後空姐就廣播話因為頭先太大風, 降落唔到, 機長會再一次嘗試降落. 果一刻我諗左幾個問題, 如果都係降落唔到. 會唔會原機折返香港!? 咁我間酒店點算?? 我之後既行程點算?? 又或者會唔會近近轉飛鹿兒島, 之後科水俾我搭新幹線番福岡, 打發我走呢? 又或者又試多幾次降落??? 我承認我係諗多左, 呢D野都係留番俾Sam哥諗. 再次嘗試降落, 今次風勢明顯細左, 雖然都有左搖右擺, 但已經無上一次咁厲害. 呢次降落確係穩定左好多. 終於都係日本時間4點左右成功降落. 我以為乘客們會好似電視劇咁拍手掌. 可惜係無, 日本人果然係比較內儉. 大家可能會疑惑, 作為香港人, 咁驚險既情況, 點會無拍片放上 Youtube 架?? 相信我, 係咁既情況, 就算香香公主坐你隔離, 你都唔會有心情拎個相機出黎. 四點半左右終於過埋海關, 成功登陸太陽. 上網對香港人黎講已經係生活既一部份, 所以一出海關就換番張上網卡先. 呢張上網卡係鴨記賣100蚊, 同富士卡包裝好相似, 都係中國聯通出品. 見佢平富士卡10蚊. 就博一博. 佢已經兼容晒 Nano Sim 同 Micro Sim, 非常方便. 之後幾日去到郊區都上到網. 7日有1.8GB, 夠晒旅行用. 要 Set 番 APN 做 "3gnet" 開番 Data Roaming (成個旅程我用左 953MB) 出左機場門口就見到接駁國內線機場既免費穿梭巴士, 車程需要大約15分鐘左右. 到左國內線機場就可以轉乘地下鐵 (2個站就可以到博多, 超方便) 不過今晚既酒店比較近衹園站, 所以就搭3個站去衹園 (260日元) 終於到左酒店, 傳統日本酒店Size. 岩岩夠你開到個喼已經偷笑. 通常東橫INN既酒店都唔會有景, 難得呢間房既景觀唔錯. 望到東長寺. 係酒店放低D行李, 休息一陣, 就出發去博多站食晚餐. 由衹園站行過去15分鐘左右, 唔算太遠. 福岡係一蘭拉麵既發源地, 唔洗講咁多, 第一餐當然要獻俾一蘭啦. 唔知係心理作用定點, 福岡既一蘭確係比香港既好味. (790日元)一碗, 比香港平好多! 博多站既一蘭拉麵位於博多地下街. 不過其實個位都幾僻, 唔係咁易搵. 我大概影低左個位置, 希望幫到大家. 首先要係博多地下街搵 西12 出口, 之後會見到一間松本清藥店. (順帶一提,呢間松本清藥店既零食非常抵買,價錢至小比其他藥店平10%) 再行前小小就會去到有間老麥, 轉左直入就會見到大大隻字寫住 "一蘭". (相片右邊3個人果個位置) 係日本食一蘭真係爽, 完全唔洗排隊!! 食完晚餐, 太座就到附近既藥店購物尻嗚! 而我都不徨多讓, 去 Yodobashi 吸下毒. 日本既相機 Counter 真係堅, 鏡頭機身任試任玩, 夠晒毒! (之後再同 Bic Camera 比較過, 發現 Yodobashi 既規模同價錢都比 Bic 優勝, 如果要2擇其1, Yodobashi 完勝) 兩間電器鋪都可以退稅8%, 用銀聯碌卡再平5%. Yodobashi 位於博多站築紫口, 一出站口向右行一陣就會見到. 行到10點,Yodobashi 都關門了. 先捨得番酒店. 去旅行食霄夜是常識吧! 去便利店買左個咖哩豬扒飯番酒店慢慢嘆. 黎到日本就當然要對番罐日本啤酒啦! 食完沖過涼就訓覺. 好好休息一下, 因為聽日就要開始自駕了!