疫情關係部份工作要延至下星期,變得較得閒,又成為了親子好節目,齊齊去東海薈飲下午茶,68折又真是好抵食。 今次都叫了幾多款,其中有我至愛的鮑汁鳳爪,細細煲的入面都有隻左右的鳳爪,扣得幾腍,夠味,唔錯。 未試過呢款鴻運金沙脆皮腸,入面脆卜卜的包住鮮蝦,都幾好味,層次感豐富。 鮮竹牛肉球,肉外還有馬蹄碎、芫茜碎果皮等,加了一點喼汁,酸酸的好開胃。 蔥油撈枝竹真是好夠清,本來是一個幾清新的配塔,可惜是唔夠蔥油,未做到好蔥油香的感覺,若多一點應該會更理想。 七味豆腐每次來吃都能保持水準,本來想叫半份,但亞仔也很愛吃,便叫了例牌,皮脆豆滑,總令人吃個不停。 滷水鵝片拼盤,味道芳香和鵝肉鮮嫩,還有滷水蛋及大腸,一次過試齊,都幾滿足。因今晚6 點開始無得堂食,只能外賣,所以飲完下午茶就响商場行街街,到咁上下見東海薈外賣有75折,就買了宮保明蝦球、銅盤生煎雞及蟲草花雜菌浸菜苗做餸,返屋企只是煮個飯就得。 銅盤生煎雞以前在堂食,就會用銅盤上,依家外賣就用膠盒上,老實講一定不及堂食滋味,但都保持到水準,雞肉好滑,仲有鮮冬菇及黑松露醬汁,送飯一流。 宮保明蝦球真是好大隻,蝦球啖啖肉,少少辣好惹味。 蟲草花雜菌浸菜苗,菜苗幾甜,菌都算香,感覺好健康。飲了下午茶,對孩子來說晚上自然想吃西式,The Story外賣75折,便買回家吃吧! 點了西冷扒配黑醋汁配薯菜,但沒有肉味,和黑醋汁也不是很夾,只是足有兩大塊,對孩子來說都夠飽,但口感真是一般。 卡邦尼煙意粉不知是否外賣,始終會差一點呢,卡邦尼有點杰身,味道較淡,不像一般餐廳的濃味,只是煙肉有點口感。 THE STORY職員很好,雖然不設堂食,但在等待時也可讓我入內坐住等。 如果食物質素能改善,坐在這裡真是幾舒服。