之前講過係中環返工，下下出去食晏真係好肉赤，無奈唔係成日有得帶飯。咁食法，我同阿奀份小小五斗米都唔知捱唔捱得到月尾。唔想做月光族，又要買外賣就要發掘下平靚正食店喇。(買完外賣又唔想返office食，點算?) 福祿壽健康素食 Fook Luk Sau Vegetarian Restaurant (Openrice介紹) 地址: 中環鐵行里8號地下 (即係中環街市附近條橫街) 我相信係中環區都好難搵到$22一個兩餸飯或者$25一個三餸飯連湯既超抵食之選。「福祿壽」每日供應十幾款素菜，飯盒份量十足，連大食阿奀都夠飽有突，所以午飯時間一定大排長龍 (但員工手腳快，只需等5-10分鐘)。隨三餸飯送既湯可能想更健康，味道較清淡，但都飲得下。如果早去買飯，仲有機會有紅米飯供應且不另外收費。 阿奀推介：素鵝 阿多推介：梅菜菇粒、西蘭花炒蛋 本立堂 Benlitang (Openrice介紹) 地址: 中環昭隆街3號地鋪 (即係景福珠寶隔離) 本立堂店面細細，堂食和外賣都幫襯過，要抵當然係買外賣，剛開始做$25一個飯盒不連飲品，不過最近加左價，好似做$28。飯盒跟生菜、小量醬菜同一隻烚蛋，但隻蛋黃唔知係咪烚完擺太耐變左瘀色，賣相減分。我地都覺得白豬排加埋芝麻醬係最好食，豬排大大塊，飯量亦多，我好多時都食剩飯，要阿奀執手尾。 阿奀和阿多推介：白豬排外賣飯盒 權記雲吞麵 Kuen Kee Won Ton Noodle (Openrice介紹) 地址: 中環蘇豪卑利街2號地下 (即係新森林隔離) 權記一碗單拼粉麵只係$16,17，雙拼就$23，最經濟實惠梗係一人一碗單拼撈亂食。一碗單拚有四粒丸，河粉份量都多，唔駃驚食完似食風。如果有「畢直」，仲可以叫多碟菜share。終極平價之選，糧尾黎就最岩。 阿奀和阿多推介：雲吞 Blog: http://kongleicouple.blogspot.hk/
