夏季正式開始!出去露營又熱,酒店Staycation 又去得太多有啲悶? 今次我哋就試下住 Camping Car ,左揀右揀最後決定去「海迎灘」! 海迎灘位於大嶼山長沙,選擇佢既原因無佢哋真係好近沙灘! 住得露營車就梗係想同陽光玩遊戲啦! 由海迎灘一行出去就係長沙泳灘,咁就玩完水返去訓覺再BBQ 直落都無問題 即刻去片睇下我哋係長沙既 2日1夜玩咗咩啦~ 海迎灘係位於大嶼山長沙海灘附近,由東涌去海迎灘坐的士都只係大約 HKD$ 70-90 (4個人一齊去係假日仲平過坐巴士)係東涌買哂補給之黎再坐的士入去就剛剛好啦~ 就係呢一個景令我哋係眾多露營車營地中選擇左海迎灘 即使今年夏天唔能夠出外旅遊,但入到黎海迎灘,係藍天白雲、一排棕櫚樹嘅襯托之下,整個環境就好似去左海島渡假一樣。 營地總共有十架露營車,分別有2人、4人、5-6人車。 雖然營地整體面積唔算大,但由於最多都係十架露營車,即使全部爆滿都係最多 40 人使用營地,唔怕會變成人逼人,無哂渡假氣氛。 行到呢個海濱休憩區可以欣賞到長沙海灘既靚景,既適合影相打卡,又可以吹下海風曬下太陽 影出黎既畫面真係唔似係香港,好夢幻~ 成個營地入面其實我哋最中意既就係呢個梳化位,除咗可以望坐海邊沙灘,仲可以坐係有遮陰位同朋友傾計,好似去左渡假,悠閑咁過一個下午。 朝早天氣可能太熱,夜晚先係出邊同朋友傾下計飲下嘢都幾Chill~ 我哋夜晚係出面逗留都一陣都唔覺有超級多蚊,營地應該有噴到蚊水~ 一朝早訓醒就可以係車窗望到外面既靚景,真係不得了!! 之後再係車入面煮返個靚靚早餐,拎出去對住個海食 (P.S.鐵板係自備嫁!如果想租電磁爐燒肉板都可以係接待處租借,但係就唔係圖中呢個樣既~~) 又或者乖乖地坐返係露營車出面食都好有 Feel ~ 講開餐具,Check-in 時係接待處交左按金後就可以得到呢一籃餐具。入面會有張紙記錄住每款餐具有幾多份,Check-out 時記得數清楚,洗乾淨先交還呀~ 其實網上見到仲有其他廚具可以免費租借,大家可以係去之前睇下官網 ( P.S. 如果想租借鐵板燒肉就要額外俾錢啦!至於係車外用電磁爐就視乎唔同車型而定) 由海迎灘營地行出沙灘只係需要 5分鐘?(其實由露營車出黎一行過木閘就已經到達沙灘) 如果假日想避開其他人仲可以一早就行出沙灘係 接近3公里長既長沙海灘散步,之後先食早餐。享受一下早上超級寧靜既沙灘都係一個好唔錯既體驗。 潮退時更會有機會影到「天空之鏡」既靚景!!!