趁著現在秋天天氣涼爽，我哋繼續帶大家行山賞芒野餐。今次要帶大家行嘅就係位於馬鞍山同西貢之間既嘅--昂平高原。由馬鞍山市中心出發最快 1.5 小時就可以到達昂平高原。一個可以賞芒草，野餐仲可以欣賞滑翔傘既地方絕對係假日好去處啦～ 唔講咁多，想睇哂全條路線難唔難行就即刻睇去片～今次我哋係馬鞍山馬鐵站 B出口嘅新港城MOSTown 地下公共交通交匯處坐新界的士出發，前往馬鞍山郊野公園入口落車 (車費大約$37)。如果大家係平日出發可以試吓去新港城MOSTown 地下公共交通交匯處坐村巴 NR84 （由商場出黎向右轉，近馬路位置會見到村巴站）然後係馬鞍山郊野公園落車 （車費$7)，但係班次非常疏落而且係居民優先，所以都唔係咁容易上到車。落車後可以係馬鞍山郊野公園燒烤場附近去廁所同買啲水補給（開始上山就再無補給點） 之後沿住車路向下斜方向行，沿途會見到 馬鞍山郊遊徑嘅路標 繼續行就會見到一條橋， 過橋後開始沿車路上斜，之後繼續行10分鐘左右就會見到指向昂坪既指示牌 係分叉路口左轉係去鞍山探索館 不過我哋既目的地係昂平高原所以繼續直行，繼續上斜行多十分鐘左右就開始到石仔路。 之後就會見到呢個位有好多車私家車停係度，應該係揸車上到最高既位，之後就要落車行。 上小小樓梯就會經過一條小溪，之後就續上山，大約行20-25分鐘石級。小心石級比較多碎石 ！（呢段亦係呢條山徑最辛苦既一段路！行完上去就好輕鬆） 上完石級就會到達涼亭，沿住指示牌直行行去昂平營地。 開始落斜，大約行多十分鐘就見到有滑翔傘係天空飛緊。 咁就代表已經到左昂平高原啦，係高原上就可以將西貢既景色一覧無遺 天色好仲可以睇到萬宜水庫東霸。北面有「大金鐘」山峰，如果有行山經驗又想有多啲挑戰嘅可以上去。 如果想舒舒服服享受下大自然就可以係草原揀個位野餐，仲可以欣賞其他人玩滑翔傘。 係草原觀景台既位置前面嘅木欄杆嗰邊有小量芒草可以俾大家打吓卡，如果黃昏既時間陽光係後面照返過嚟都應該會幾靚！ 總結： 呢個草原雖然唔算超級容易到達，但如果好似我哋咁坐村巴/的士上到馬鞍山郊野公園先起步，已經行少左一半路程，只要小心慢慢行石級路段就可以欣賞到昂平高原呢個咁靚嘅地方。不過提醒返大家如果離開時唔想坐的士，回程原路行返落馬鞍山郊野公園（大約45分鐘至1個鐘）之後再繼續沿車路行多大約45分鐘至1個鐘就可以到達馬鞍山市中心新港城。 因為由昂平高原落馬鞍山市中心新港城 全程都要差唔多 2個鐘，所以大家要預好時間呀！-------------------------------------------------------------------------起點：馬鞍山新港城公共交通交匯處 - 馬鞍山郊野公園入口交通： 的士(車費:$37-40) / 村巴 NR84(車費:$7) / 步行上馬鞍山郊野公園 (大約1小時）中途：馬鞍山郊野公園- 昂平高原步行： 沿車路走20分鐘 - 石仔路/石梯級 20-25分鐘 - 下斜 10 分鐘 --到達終點： 原路走回馬鞍山郊野公園 (45分鐘) - 沿車路下斜坡走回馬鞍山市中心(大約1小時)
