今年好多地方既中秋節活動都因為疫情關係取消左，正煩惱緊今年會唔會無地方賞花燈。聽聞大澳有好多花燈睇，我地見反正好耐無去過大澳就即刻入去睇下棚屋同花燈。即刻去片！！今次我哋係坐昂坪 360上去昂坪行左一陣再係昂坪巴士站坐 21 號巴士入去大澳。去既日子係平日星期一下午，都算多人。如果想坐巴士既就要早啲去排隊啦～去到大澳因為見到係平日，大街好多店舖都無開所以我哋行左入去大澳文物酒店食下午茶先。舒舒服服食大澳小食等睇日落亮燈！註： 下午茶時間 5 點完結。 原來係大澳文物酒店入面食個下午茶都唔算好貴！大約100蚊左右，係大澳黎講都算係差唔多。我哋一行 4 人分別叫左 蝦醬炒飯，Fish n Chips，公司三文治同蝦醬豬扒包。樣樣都算係幾好食😋 其中最有特色應該就係蝦醬豬扒包，最初我哋都怕會好濃既蝦醬味，但係原來餐廳只係會將小量蝦醬塗上面包，另外就會有一個小容器裝住蝦醬俾客人自己加！方便大家自己調節口味～ 飲品方面跟餐包左咖啡/茶 又或者 大澳特飲！我地無叫左大澳紅樹林特飲，反而叫左鹹檸檬梳打配蜜糖，鹹鹹甜甜真係好消暑～食完個好滿足既下午茶我哋就一路慢慢行返去大澳市中心等睇燈籠啦！上網睇返資料大澳既花燈亮燈時間應該係下午 6:30 - 9:30， 而呢個花燈節仲會一直做到 10 月尾！大家過左中秋都可以繼續去睇！我哋今次大約去左 4 個位置睇花燈，地圖入面紀錄左大澳花燈節2020 既燈飾位置。 其中咁多個位置入面我哋反而最中意既係係大澳文物館行返入石仔埗街，係舊大澳消防局前既一個茶水檔出面既裝飾！除左燈籠之外，仲有寫住大澳兩個字既仿霓虹燈，會變色既LED兔仔。個畫面真係好靚好有氣氛，有時仲會遇到大澳妹妹幫你手影相！ 睇完LED兔仔就行入少少去到舊大澳消防局前面，之後一路沿住石仔埗街行都會見到好多燈籠掛左係上面。 去到有壁畫睇既廣場之後就轉入吉慶街就會見到唔同既佈置，由「之字型」既燈飾變成打直三行既佈置。 之後再繼續行入去就會見到呢間東京士多，行入小路會見到另一個打卡位 ---- 東京碼頭！哈哈（不過東京碼頭要日頭連埋棚屋影先靚） 繼續沿住吉慶街就會到達最後一個好靚好靚既打卡位 ---- 大澳非茂里！ 呢個位我哋係未天黑既時候經過左一次，見到大家都好努力準備緊！有種好熱血既感覺！晚上再行返過去完全同朝早比係另一種感覺！係我哋行既路線入面，最多最多燈籠同最多人停低影相就係呢個地方啦！呢個位真係超有氣氛！ 睇完非茂里既燈籠裝飾我地就踏上回家之路～係大澳巴士站總站坐返 11 號巴士出去東涌，不過同去程一樣，平日既晚上大約 7 點半都已經好多人等巴士，如果想上到車記得要早啲去等車啦～附上 11 號巴士時間表 希望以上既資料幫到大家～中秋節快樂！P.S. 大家入到去大澳記得都係要戴口罩！同埋唔好亂入人哋既棚屋呀~
