會去釜山嘅朋友都會去海雲台行吓。但我今次係第二次嚟海雲台所以只係路經性質。去我今日第一個景點之前當然要食飽個肚先啦! 我喺海雲台傳統市場食咗呢碗海鮮辣辣刀削麵。呢碗刀削麵冇兩至三個人都真係食唔晒。大家估下呢碗面有幾多隻青口?初初數都以為得10隻。點不知食下食下發覺成碗有成20隻青口。我只可以話呢碗7000won 嘅麵係可以填飽你個肚但係味道真係麻麻地,仲要係大熱天時食啲咁辣嘅麵我都覺得自己傻傻地。 食完麵就去海雲台7號出口坐181或9號巴士去海東龍宫寺。巴士會經過樂天outlet,當大家見到樂天outlet下一個站就係海東龍宮寺。落車後就會見到好大個招牌指向海東龍宮寺嘅方向。入寺拜神當然要比啲恆心啦!份恆心就係要行大概十分鐘嘅亡命斜路。再行遠10分鐘平路就會見到好多小食攤檔。大家可以補給下因為前邊仲有幾十級樓梯等緊你。 過咗啲小食攤檔之後會見到十二生肖像喺門口迎接大家。 穿過呢個門口就係我頭先所講嗰幾十級樓梯。 當然去嘅時候要行幾十級樓梯落去,走嘅時候就梗係要行返幾十級樓梯上返去啦。行樓梯嘅時候大家記得要小心啊! 落到下面之後真係別有洞天。本人每次去到廟寺為咗尊重理由其實好少會影相,只係影咗幾張遠景。個人認為呢個地方係值得嚟睇睇但係未必會嚟第二次。年紀大,條斜路真係行得好金。 大家走嘅時候可以過對面馬路坐返回程車返去海雲台。另外一個建議係可以係落車嘅站坐返181號巴士去機張食海鮮。 當日我就坐返回程巴士返去海雲台。去沙灘方向沿路有個期間限定週末市集買一啲手工精品(其實係10分小型所以唔需要太有期望)。嗰度有棵許願樹俾大家寫上願望掛上去。係同一條路晚上會有音樂噴泉表演。 我去嘅時候係六月頭,當時海雲台舉行一年一次嘅沙雕展覽。 點擊圖片放大 +2 海雲台真係一個好鬼死多人去嘅沙灘。雖然係好多人但不失係一個十分之悠閒嘅地方。當日坐返回程巴士返海雲台係要等到黃昏,希望係太陽落嘅時候睇到我想影嘅夜景。 喺海雲台開始行去冬柏公園。途經會見到美人魚着、燈塔及APEC世峰樓。呢啲夜景只不過係前菜,重點係要去影水中倒影。 沿住我頭先講嘅路徑,差唔多去到入口喺左手邊有條隱蔽嘅樓梯指向洗手間,一直行到最抵向右行就會見到一排排嘅高樓大廈。行嘅時候大家記得要小心車輛。向左手邊有個好隱蔽嘅入口就係要影水中倒影嘅地點。其實呢個地方已經唔係一個秘密。你會見到好多人趴係地下影相。大家去嘅時候記得小心安全,因為嗰度好黑,一唔小心就會跌咗落海。呢個景係咪好熟呢?咪就係孔劉喺度影過廣告囉。 嗰日係星期五The Bay 101 有好多人坐喺出邊飲嘢。比起第一次嚟烏蠅都冇隻爭得遠。 其實沿住對面高樓大廈嘅海岸線一直行就係海雲台電影大道。聽落好似好勁咁但係條大道真係得個長字。 點擊圖片放大 我諗差唔多行咗大約20分鐘先至睇到我想睇嘅來自星星的你都文俊嘅手印。呢張相係我同都教授最近接觸嘅一張。我個心諗千頌伊呢。 行到最後我都已經唔知道自己身處何方。好好彩比我遇到兩位好人,仲要兩位都精通英文。最後嗰位阿豬媽抓住盒蛋都要好熱心咁樣帶我去地鐵站。所以我都話,雖然今個旅程Wi-Fi死咗但係釜山海雲台、海東龍宫寺、冬柏公園、The Bay 101好好彩比我遇到貴人幫忙。