去過釜山嘅朋友都應該去過甘川洞文化村。釜山的確有好多唔同類型嘅壁畫村而今次為大家介紹嘅壁畫村係位於加德島。如果大家喺Google 搜尋加德島我估大家會見到 Klook 或者 KKday 嘅半天團。事實上去加德島嘅交通真係唔係好方便，所以我都係參加Klook 嘅半天團。先至聲明，呢個post 真係唔係幫呢兩間旅行社買廣告。大家報名前記得隔下價。 我去當日係星期四早上九點鐘喺釜山車站出發。第一站我哋去咗松島坐纜車。松島纜車係喺2017年6月開放。大家記住團費係唔包坐纜車嘅門票。有兩款纜車選擇，一款係普通，一款係全透明車廂。本人覺得普通車廂其實都已經可以睇到大部份嘅景色。 如果你唔係參加團嘅話可以選擇單程或者來回。一程大概坐8分鐘。纜車去到對面岸就係岩南公園。喺纜車上邊其實你會見到一條鋼鐵步道。如果選擇單程纜車嘅你可以行吓呢條松島海濱長廊，全長大約1.2公里。我第一次去釜山嘅時候都有行過呢條步道。 當日我搭纜車去到岩南公園喺纜車站大概行咗20分鐘。係纜車站可以上頂樓有個觀景台。 落一層就係一間餐廳，再落一層就係坐纜車嘅位置。旁邊有啲小食檔。我買咗條魚糕做早餐辣辣地都幾好味。 之後我就坐返回程纜車行下條松島天空步道。坐纜車可以睇到條天空步道嘅全景。係松島逗留大概一個半小時。因為我去係平日所以冇乜人絕對足夠時間影相。 第二站就係去加徳島嘅壁畫村。坐咗大概一個鐘頭多少少。真心覺得如果要自己坐車去真係會好麻煩。呢條壁畫村其實係一條好細嘅漁村好似流浮山咁種植蠔。唔好諗住有得買有得食，嗰條村係靜到人影都冇隻。因為想多啲人認識呢條漁村所以就加咗啲壁畫係屋前，但係因為交通唔方便所以都冇乜人嚟參觀。覺得真係有啲浪費，不過如果我係嗰度嘅居民我都唔想有太多嘅滋擾。如果要同甘川洞文化村相比加德島呢條壁畫村絕對唔夠影相位。但係呢條壁畫村勝在夠零靜唔使同人爭位影相。如果之前去過甘川洞文化村嘅你不防去下加德島睇睇。 點擊圖片放大 +12 呢個團其實有幾個drop off 位。1）甘川洞文化村 2）札嘎其市場 3）南浦站 4）釜山站。如果未去過甘川洞文化村可以煩少樣去到第三個景點。因為我上次去過所以我最後都係返返去釜山車站。真心覺得呢個團費有人車你去三個釜山景點絕對係值得。
