今次為大家介紹係我早前(2018年6月) 喺釜山入住嘅膠囊式酒店。大家去釜山嘅時候除咗海雲台唔知有冇去過廣安站嘅沙灘呢？我自己去過兩次釜山兩次都係住喺廣安站。第一次去係因為方便去睇每年10月尾嘅煙花大會演。第二次去係因為見到一篇報道介紹一間新開嘅酒店叫做Hotel 1，所以再次想去釜山一遊。 間酒店最吸引之處就係就算住喺膠囊都有個窗可以望到廣安大橋嘅景色。其實除咗膠囊佢哋都有獨立房間，所以唔習慣同人共用房間同洗手間都可以選擇呢間酒店。坦白講廣安站冇西面或者南浦站咁方便，但係廣安沙灘真係一個好靚嘅地方。真係望住過海都可以坐到由朝到晚。平日日頭可能冇乜人但係一到夜晚或者週末就會熱鬧起嚟！夜晚仲會有人唱歌busking 同放煙花，真係好有feel 㗎！ 講番間酒店先，酒店以白色為主。一入到去就會有個人俾條鎖匙你放對鞋喺locker。Check-in嘅手續喺門口處理，記得四點後先至可以check-in啊，不過你可以放低行李先嘅。第一二層係佢哋嘅lounge。過景就當然係廣安大橋啦！比9000won 就可以坐喺哥lounge 到hea 四粒鐘。提供飲品、杯面、小食、雪糕任你食足四個鐘。假日都幾多人幫襯㗎。 3樓4樓就係女嘅膠囊房間，5樓就係男嘅膠囊房間。6至9樓都係獨立房間。每個層數都要用房咭先可以上去。頂樓就係一個陽台，但因為我每晚都好夜返酒店冇機會上樓上睇睇。 我嘅房間係3樓，一出電梯就有一排locker 俾你放行李或者私人物品。因為locker 分上下層，size 又唔係好大，剛剛可以比我放到個中size 喼入去。好彩個喼係吉嘅如果唔係要我抬個喼上去locker 都幾吃力。酒店放咗一袋日常用品、兩條毛巾同睡衣喺locker裏面。每日都會比袋新你。袋日常用品裏面有一對拖鞋、sample 裝嘅body cream、一支筆、一疊memo同一包紙巾。膠囊式洒店都算提供好多嘢比住客。為免要每日攞個喼落嚟我就索性將我四日嘅用品拎晒出嚟。入到房間我相信有超過40個膠囊，第一個感覺唔係咁好，有啲焗，有喲黑同有啲好似新裝修嘅氣味。我當日入住係星期三所以我相信冇乜人，十分之靜。到咗週末會比較多人，因為我見到膠囊出面有好多對拖鞋。比起我之前喺日本住過嘅膠囊酒店呢間啲住客真係喺房間不發一言。個人意見我比較鍾意訓上層嘅膠囊。入到自己個膠囊見到個無敵海景同廣安大橋乜嘢唔滿意都忘記晒。其實膠囊裏面都有把風扇仔可以用。點擊圖片放大 我嗰層一共有六間嘅浴室，當然係花灑式。雖然係共用不過個浴室都係屬於獨立式嘅。浴室提供洗頭水、沐浴露同護髮素。係梳洗嘅位置會係開放式。提供風筒同按摩器。假日晚上有可能要排隊等候浴室同朝早（大概9點至10點）會有比較多人梳洗。韓國嘅靚女真係花好長時間化妝同整頭髮㗎。如果唔想等就可能要早少少起身啦！ 住係呢間酒店絕對為咗個景冇理由唔打開個窗簾瞓覺㗎嘛。原來廣安大橋大概一點鐘係會熄燈㗎! 瞓到大概4點出面開始光我就關起個窗簾再瞓過。其實有一日大概五點鐘我係教咗鬧鐘去睇日出㗎。其實住喺呢間酒店另外一個原因就係想睇一次日出。呢一次係我人生第一次睇日出。可以唔使點郁就可以睇到人生第一次日出，超方便！ 當太陽出來了嘅時候個膠囊係有啲焗同熱。其實膠囊同獨立房間都有分海景同街景。海景當然會貴少少啦！平均每晚大概港幣＄300，睇到呢個海景我覺得物超所值。如果喺日本乜景都冇嘅膠囊都要＄300以上。 以下係佢哋嘅官方網頁： https://www.hotel1-en.me/ 因為係佢哋嘅官方網頁訂房只有韓文，為免出錯我去佢到嘅Facebook messenger 訂房。 https://www.facebook.com/hotel1busan/ 因為洒店好返沙灘我都專登搵一日灘係個沙灘度。 點擊圖片放大
