呢一間要介紹嘅Cafe 喺釜山近南浦車站7號出口，叫做Check-in Busan。呢間Cafe 係台灣人開，所以去到可以用國語溝通。呢間Cafe 嘅特別之處就係有售自家明信片，出邊冇得買㗎。明信片選擇大多數都係釜山嘅美麗景色。客人寫上明信片之後可交比Cafe 代為寄出。甚至乎可以按照客人指定日期 (例如出年嘅同一日) 寄出明信片。其實呢間Cafe 之前有好多blogger 都有寫過，但我都好想極力推介俾大家。 按照以下地圖 (Naver Map) ，南浦車站7號出口直行2-3分鐘就到達。 直上3樓 P.S. 旁邊（黃色招牌）間找換店，係我去咗五間以上最好匯率嘅找換店。附近其實有好多找換店可以先格下價。 一上到去就有位好有禮貌嘅男仔用國語同我打招呼。食物方面其實佢哋唔多選擇，只有兩款三文治同 All Day Breakfast，亦有台式奶茶或咖啡。我叫咗個蘑菇三文治一杯凍嘅Earl Grey 奶茶。佢哋啲食物即叫即做，所以都等咗大概5分鐘。當佢送上三文治嚟嘅時候嚇咗我一跳，因為份三文治個size都幾大。個三文治好好味，啲蘑菇煮得好香好多汁，生菜又夠新鮮。佢仲有啲水果伴碟添。杯奶茶都好好飲，茶味好香。飲到最尾發現係一個茶包扣咗少少分。我會建議攞走個茶包，賣相就會好好多。 呢個位置係比客人選購明信片。除咗明信片之外其實佢都有其他精品發售。 呢個位置係放將要寄出嘅明信片。佢有一張小字條，叫客人尊重別人私隱不要看其他明信片所寫的內容。 當揀好明信片俾錢嘅時候，佢會問你是否需要寄出然後另加郵票。佢哋會提供一個寫明信片嘅格式方便客人寫上希望寄出明信片的日子。佢哋亦有提供不同顏色嘅筆，膠水同印章方便客人使用。 當日我買咗兩張明信片。一張希望係今年(2018)九月我生日嘅時候寄出，另外一張係一年後寄出(2019年6月2號)。其實佢哋都有要求客人要喺2019年內寄出。都人之常情，冇理由要Cafe 代keep 起張postcard 成十年。郵費都會加價啦！ 我自己每次出去旅行都有寫明信片比自己嘅習慣。咦呢間Cafe 提供根據客人希望寄出明信片日子我就覺得份外有意思。因為可以一年後睇返自己一年前的旅遊經歷。真心認為呢間Cafe 啲postcard 都影得好靚好特別。最重要係佢個三文治而家諗起都想食。 Cafe 個環境好靜，有啲似學校圖書館。佢仲送左張南浦區及釜山地圖比我。雖然冇乜用，但係一份小心意。最後我離開嘅時候有位女仔仲介紹喺南浦行街好地方。下次再嚟釜山一定會再嚟呢間Cafe 。 點擊圖片放大 大家如果係南浦shopping行街覺得攰嘅時候會諗起呢間Cafe想去歇歇腳。寫張明信片比自己回顧今次嘅旅程。 以下係佢地個網頁: (記得睇清楚Cafe 幾時休息呀!) http://checkinbusan.com/
