自從上年同事帶我去睇Baseball之後,間唔中都會跟佢地一齊去睇。呢個星期五六日係新球季開始,當然要去捧Fighters場。 揀咗星期六嗰場去睇,同事之前已經幫大家online買咗票。由地鐵站行去Sapporo Dome已經舉晒牌話全場滿座,好彩一早買定。 14:30開場,最後打到19:45先完,加時打足12局,最後和。5小時15分鐘的比賽雖然長,但係好精彩。開頭俾Buffaloes攞咗兩分,第3局中田翔嚟個Home run追平,又從新嚟過。之後幾局兩邊都無得分。到最後第9局Buffaloes先攞兩分,當大家以為Fighters會輸的時候。全場4萬人企晒起身,不斷唱住應援歌,每個球員出場都會轉歌打氣⋯⋯到中田翔出場真係嚟個Base Hit拎返兩分,要打加時!加時兩邊都無再有得分,到第12局,和氣收場! 其實我仲未好識Baseball的規則,如果有講錯真係唔好意思。比起勝負,去睇Baseball的氣氛真係好好,就算有個疑點球睇埋錄影帶因為有盲點判得唔好,大家都唔會灰心,繼續為自己支持的球隊打氣。 今季有台灣球員王柏融加入,每次佢出場我地都勁叫加油。星期六呢場佢有個一壘,希望佢喺Fighters愈打愈好!