上一篇寫病,呢篇就寫返睇醫生。其實每個月交年金、健康保險、入息稅同埋住民稅,都差不多交咗四份之一人工。既然係已出之物,都係睇睇醫生穩陣。 去醫院付設的診所,一去到就問我身體有咩唔舒服,然後就出示健康保險咭登記。因為呢邊有好多分科醫院,所以護士就同我解釋呢度唔係內科,做唔到深入的檢查,如果我無問題就可以見醫生。 之後護士就帶我入咗診症室等醫生,呢個時候要探熱,原來呢度探熱係探腋下。等咗一陣醫生就同另一個護士一齊入嚟,一開始問我聽唔聽得明日文,我話簡單日文可以。之後我就講返有咩唔舒服同食咗啲乜嘢,醫生再幫我檢查就叫我唔駛擔心,食藥就會好,無胃口食嘢就飲保礦力。之後就俾錢,有保險只係俾30%,總共1070円。 由於日本係醫藥分家,所以睇完醫生就要拎住張處方去隔離的藥房配藥。配藥都係保險包括的範圍,交低處方同健康保險証,就等配藥。太耐無睇醫生,已經唔知自己本藥物手帳去咗邊,所以順便整返。最後,攞咗3日的腸胃藥同止瀉藥,總共730円。 幸好有健康保險,睇醫生都係合理價錢,當然唔需要用到呢個保險更好啦!