4月又新年度，2月3月都好忙。啱啱趕完2月尾的deadline，趁有個空檔，就去仙台玩幾日。 今次係第一次去東北，點解揀仙台純粹係睇機票時間價錢啱就決定，去到梗有嘢睇。去之前忙到不得了，所以完全無準備，連行李都係嗰朝起身執。 第一日 晴 札幌 -> 仙台 -> 商店街 中午機到仙台，搭JR出仙台駅，check in擺低行李就去商店街亂行。而家去旅行都係鍾意無plan隨心行，累就坐低食嘢飲嘢，慢慢享受呢一個城市。 第二日 雨 宮城県美術館 -> 仙台城跡 -> 商店街 全日落住毛毛雨，所以去咗美術館。食完飯再行埋附近的仙台城跡，然後又再返商店街閒逛。夜晚就試咗A5仙台牛，真係好好味！每一個地方出產的牛肉都有獨特的肉香，去到唔同城市都要試試。 第三日 晴・雪 松島 -> 仙台うみの杜水族館 -> 三井Outlet Park 今日出門口係好好太陽，但係又落住雪。搭仙石線去松島，一心諗住去到松島海岸駅落車，點知班車中途回頭，要落車轉月台，突發事件亦係樂趣。 去到松島就去坐遊覽船，唔同形狀大大小小的島，真係好特別。之後四圍行又四圍食，好悠閒！之後見時間尚早就去埋水族館，回程JR又突然停咗一陣，幸好都趕到接駁車。水族館入面，最吸引我的係企鵝，見佢地周圍行又搶嘢食，好得意！ 由水族館行大概10分鐘就到outlet，本身無特別嘢想買，點知去到Adidas有額外減價，好多鞋款outlet價再6折，最後買咗兩對！回程到仙台駅，試咗米沢牛，好味到不得了！好似我一個人去食飯又唔想book位，通常都揀晚市一開門就去，通常都ok！ 第四日 晴 仙台 -> 札幌 搭下午機返札幌，朝早check out之後就去食早餐，行一陣又搭返JR出機場。去到機場就買手信俾同事，再食啲嘢就上機。四日零準備之旅完成，發覺東北都幾啱玩，可以靜靜休息！
