雖然日本嘢好啱胃口,但係總會掛住家鄉的味道,所以每次返香港都會托啲唔同嘅醬料返嚟。 今次試陶大魚香茄子醬,都幾合我口味,下次試埋李錦記再比較。米粉就係上次去台北玩,喺桃園機場入閘前買,台灣米粉真係好好味。 茄子 3條 免治豬肉 150g 米粉 1份 魚香茄子醬 1包 油 適量 水 適量 葱 適量 由於日本茄子係細條,所以要用3條,如果平時香港嗰種一條就可以。先將茄子去部份皮再切粒,然後就落油起鑊。鑊夠熱就放茄子,炒到開始軟就落埋免治豬肉。豬肉差不多熟就落醬,慢慢拌炒,按情況落少少水,避免太杰會燶。呢隻米粉唔駛浸,用水沖一沖就可以直接炒。等米粉軟身到自己鍾意的程度就可以上碟,最後加少少葱喺面就完成! 大家睇我啲步驟好明顯係隨心煮,最緊要方便自己,盡量唔想撈起回鑊。要求唔高嘅我,呢個真係易煮又好味!